Stacioni kryesor i trenit në kryeqytetin hungarez, Budapest ka hapur dyert për qindra emigrantë të bllokuar në hyrje të tij për dy ditë më radhë.
Sapo u hapën dyert, njerëzit vërshuan drejt platformave e stacionit, në përpjekje për të marrë trenat që të dërgojnë më thellë në Europë, në Gjermani.
Vendimi për hapjen e dyerve të stacionit duket se është marrë pas bisedimeve që kryeministri i vendit, Viktor Orban, i njohur për pikëpamjet e tij kundër emigrantëve, ka nisur në Bruksel në lidhje me këtë krizë.
Numri i emigrantëve që kanë hyrë në Europë deri tani është në nivele rekord; 107,500 persona hynë vetëm gjatë Korrikut.
Por, ndërsa disa vende si Gjermania janë të përgatitura të presin një numër të madh azilkërkuesish, vendet e tjera nuk e kanë këtë qëndrim. Ministrat e Brendshëm dhe ata të Drejtësisë takohen në Bruksel në datën 14 Shtator për të adresuar krizën. /tesheshi.com/
