Drejtuesit më të lartë të shtetit, presidentja Atifete Jahjaga e kryeministri Isa Mustafa ngushëlluan familjen për ndarjen nga jeta të akademikut Pajazit Nushi.
“Ndarja nga jeta e akademik Pajazit Nushit, simbolit të dijes dhe të paqes, është humbje e madhe jo vetëm për familjen, miqtë edhe bashkëpunëtorët, por për gjithë Kosovën. Në emër të qytetarëve të Republikës së Kosovës, në emër të Institucioneve dhe në emrin tim personal, ju lutem pranoni ngushëllimet më të sinqerta”, thuhet në telegramin e presidentes Jahjaga.
Kryeministri Isa Mustafa në telegramin e ngushëllimit për familjen Nushi, e cilëson një humbje të madhe ndarjen nga jeta të akademikut, jo vetëm për familjen, por edhe për shkencën, arsimin, kulturën dhe akademinë e Shkencave dhe të Arteve të Kosovës.
“Akademik Nushi, me përkushtimin e tij të jashtëzakonshëm, ka dhënë kontribut shumëdimensional për Kosovën, duke qenë ndër të tjera edhe një figurë e spikatur në fushën e mbrojtjes së lirive dhe të drejtave të njeriut në Kosovë. Me jetën dhe veprën e tij, akademik Pajazit Nushi, do të mbetet përherë në memorien e popullit të Kosovës si një nga personalitetet më të shquara të kohës sonë”, shkruan Isa Mustafa ./tesheshi.com/
