Ministri i Punëve të Jashtme, Enver Hoxhaj ka takuar në Uashington kryetarin e Komisionit për Politikë të Jashtme të Kongresit Amerikan, Ed Royce dhe zëvendësin e tij, kongresistin Eliot Engel, të cilët i ka falënderuar për përkrahjen ndaj Kosovës.
Sipas njoftimit zyrtar të MPJ-së, Hoxhaj i ka informuar miqtë e Kosovës për progresin e viteve të fundit, por njëkohësisht edhe për sfidat që ka përpara për të kompletuar shtetësinë të cilat Kosova mund t’i tejkalojë vetëm me ndihmën e SHBA-së.
“Kosova është e bekuar me miqtë amerikanë që ka në të gjitha nivelet e administratës në Washington. Kjo përkrahje ndihet çdo kund dhe është e përjetshme. Ne do të vazhdojmë ta kultivojmë për ta thelluar edhe më tej”, ka thënë Hoxhaj pas takimit.
Gjatë qëndrimit në SHBA, në ditën e fundit të vizitës, Hoxhaj ka takuar edhe kryetarin e Komisionit për Inteligjencë të Senatit, Richard Burr, me të cilin ka diskutuar për sfidat globale të sigurisë dhe nevojën e vazhdueshme për të pasur vëmendjen e shtuar të SHBA-së në rajon.
Po ashtu, ministri Hoxhaj ka mbajtur edhe një ligjëratë para një audience ekspertësh të përzgjedhur të Ballkanit dhe Evropës në Atlantic Council ku ka folur për sfidat historike të rajonit nga perspektiva e Kosovës. /tesheshi.com/
