Ambasadori gjerman në Tiranë, Helmuth Hoffman, ka dhënë një rrugë prej së cilës duhet kaluar detyrimisht për të kërkuar vend pune në Gjermani.
Duke folur për emisionin Top Show, ambasadori Hoffman, tha se të gjithë njerëzit që ndodhen në Gjermani, duhet të tërhiqen menjëherë nga kërkesa për azil dhe duhet të regjistrohen për punë në ndonjë agjenci apo ndërmarrje. Kur të kenë në dorë këtë kontratë, ata lirisht mund të marrin vizë punë dhe kështu automatikisht marrin leje qëndrimin në vendin e punës.
Deklarata e plotë
“Të gjithë duhet ta kuptojnë dhe dëgjojnë me vëmendje këtë që po them. Pothuajse të gjithë shtetasit shqiptarë që kanë bërë kërkesë për azil në Gjermani shtyhen nga motive ekonomike. Ata shkojnë atje për një vend pune. Por, këtë nuk mund ta arrijnë kurrsesi duke kërkuar azil në Gjermani në sensin juridik të fjalës.
Kush dëshiron të punojë në Gjermani nuk duhet të bëjë kërkesë për azil politik pasi të gjithë shqiptarët, e theksoj këtë të gjithë shqiptarët, marrin një vendim refuzues. Dhe pikërisht qeveria federale verën e shkuar ka marrë një vendim të rëndësishëm për të ofruar mundësi ligjore të mëtejshme për punësimin e shtetasve që vijnë nga Ballkani Perëndimor në Gjermani dhe këtë e bën sepse kërkon të reduktojë në njëfarë mënyre barrën që ka sistemi i azilit në Gjermani, duke bërë që prej këtij sistemi të përfitojnë ata shtetas që janë subjekt i përndjekjes së tyre politike, si shtetasit që vijnë nga Siria. Kjo do të thotë që në qoftë se dëshirojnë që të punësohen në Gjermani, kjo nuk duhet të bëhet në asnjë mënyrë nëpërmjet rrugës së azilkërkimit, por duke shkuar në Gjermani e duke kërkuar atje një vend pune. Punëmarrësi, me një kontratë pune duhet të kthehet në Shqipëri dhe të vijë pranë Ambasadës gjermane dhe të aplikojë për vizë pune. Kjo do të ishte rruga e duhur për mundësi punësimi në Gjermani”, tha ambasadori Hoffman. /tesheshi.com/
