Nuk janë të shumtë vizitorët nga Perëndimi në Korenë e Veriut, shtetin e izoluar komunist. Filatelisti holandez, Willem van der Bijl ishte një prej tyre dhe është pronar i koleksionit më të madh të posterave të propagandës koreano-veriore, një hobby që dikur për pak e futi në telashe të rënda.
Ai nisi ta vizitojë Korenë e Veriut në 1998-ën me ftesë të Koorporatës së Postave të këtij vendi, për shkak të profesionit të tij dhe dëshirës për të mbledhur pulla postare.
Pas shumë udhëtimesh nëpër të gjithë Korenë ku ai kërkoi të plotësonte koleksionin e pullave, ai arriti të krijojë edhe një koleksion prej më shumë se 1 mijë posterash, një pjesë e të cilave do të dalin për publikun në Muzeumin e Artit Modern në Seul.
Si të gjithë të huajt në Korenë e Veriut, Van der Bijl monitorohej ngushtë nga shteti. Por, në vizitën e tij të fundit në këtë vend në vitin 2010, dyshimet u rritën dhe ai u arrestua për spiunazh.
Pas dy javësh marrjeje në pyetje, ku i dhanë për të ngrënë vetëm oriz të zier dhe e kërcënuan me 15 vjet burg, ai nënshkroi një rrëfim dhe u largua në Holandë. Nuk iu dha kurrë arsyeja e arrestimit, por incidenti bëri që ai të shpallej persona “non-grata” në Korenë e Veriut dhe të mos e shtonte dot më koleksionin e posterave të propagandës komuniste. /tesheshi/
