Histori spiunazhi dhe “puçi” në Shkup, Zaev flet me kode ndaj gjykatës për Gruevskin

Mensur Krasniqi

Anulohet edhe një herë seanca gjyqësore për rastin “Puç”.

Për shkak të mosprezencës së liderit të opozitës maqedonase të LSDM-së, Zoran Zaev në seancën dëgjimore, gjykatësja ka vendosur të anulojë shqyrtimin kryesor të çështjes, ndërkaq Prokuroria ka propozuar që t’i mirret dokumenti i udhëtimit(pasaporta).

Zoran Zaev, ashtu siç pretendohet në padinë e kryeministrit Nikolla Gruevskit ndaj tij, është i dyshuari i katërt për vepra penale të “Spiunazhit” dhe “Dhunës ndaj funksionarëve shtetërorë”. Padia penale vjen menjëherë pas publikimit të bombave të Zaevit lidhur me përgjimet, gjë që dëshmon qartë sipas Zaevit mbi kriminalitetin e autoriteteve qeveritare në krye me kryeministrin Nikolla Gruevski.

Zoran Zaev nuk është paraqitur për të satën herë në seancën gjyqësore, gjithnjë sipas arsyetimit të tij se nuk e respekton gjykatën që është nën kontroll të plotë të pushtetit. Në seancën e kaluar gjykatësja kishte paralajmëruar që në rast se Zaev nuk paraqitet edhe sot në gjykatë, atëherë do të jep urdhër që në seancën e ardhshme të sillet nën shoqëri të policisë.

Derisa ekipi avokatëve të Zaevit, paralajmëruan që do të kërkojnë anulimin e këtij procesi gjyqësor deri në zgjedhjen e Prokurorit Special. Ky Prokuror pritet të zgjidhet deri më 15 shtator, si pjesë e marrëveshjes së “Përzhinos” për dalje nga kriza politike.

Mirëpo ky arsyetim nuk i intereson gjykatëses. meqë sipas saj, ajo punon në bazë të ligjit dhe jo të marrëveshjeve politike.

Në procesin gjyqësor të “Puç-it”, të akuzuar tjerë janë ish drejtori i DSK-së Zoran Verushevski, gruaja e tij Sonja Verushevska, i punësuari në MPB Gjorgji Llazarevski dhe funksionari i komunës së Strumicës Branko Palifrov. /tesheshi.com/