Sot ka marrë formë zyrtare tërheqja e kërkesës së Italisë për t’i organizuar Lojërat Olimpike të vitit 2024.
Presidenti i Komitetit Olimpik Italian, Giovanni Malago, ka qenë ai që i ka dhënë fund kërkesës së kryeqytetit italian për t’i organizuar këto lojëra, pasi më herët kryebashkiakja e Romës nuk pranoi ta mbështeste projektin.
“I shkrova sot Komitetit Olimpik Ndërkombëtar për ta tërhequr nga gara Romë 2024-ën,” njoftoi Malago në një konferencë shtypi të posaçme.
Shpresat e Romës për t’i organizuar Lojërat Olimpike e morën goditjen fatale muajin e shkuar, kur këshilli i qytetit votoi në favor të kërkesës së kryetares së bashkisë, të zgjedhur jo shumë kohë më parë, për të mos i dhënë mbështetje projektit. Qëndrimit të Virginia Raggi-t i dolën në krah me votë dy të tretat e këshilltarëve.
Lojërat Olimpike Verore janë zhvilluar vetëm një herë në Itali, në Romë, më 1960, ndryshe nga ato dimëroret, të zhvilluara tre herë. Lojërat olimpike të Torinos, në vitin 2006, kanë qenë të fundit të zhvilluara në këtë vend. /tesheshi.com/
