Për 29 vite ajo pyeste veten se cili kishte qenë fundi i fëmijës së saj dhe çfarë rrjedhe kishte marrë jeta e tij, në rast se do të ishte ende gjallë. I vogël kishte dalë të luante por nuk ishte kthyer më kurrë në shtëpi. Dukej sikur ishte zhdukur në mes të gjithçkaje, aq sa edhe policia nuk kishte arritur ti jepte përgjigje një çështje që kishte ngelur e hapur për tre dekada me radhë.
Kur shpresat dukej se ishin zhdukur, një dhuratë e papritur ndodhi. Kthimi i atij fëmije, tashmë i bërë një burrë, i ndërroi jetën të ëmës dhe gjithë të afërmve të tij. I vogli ishte shfaqur pas shumë kohësh, ndërsa në fillim të jetës së tij, një tren në të cilin kishte hipur gabimisht, e çoi 300 kilometra larg shtëpisë.
Jiang Ming sot është 37 vjeç, por ishte vetëm një fëmijë 8 vjeçar kur hipi në vagonin e një treni që i ndryshoi drejtimin e jetës së tij. Ai ishte duke luajtur në stacionin Shaanxi në Kinë dhe kishte hipur në një tren që e çoi në Qu County në Sichuan.
Kur zbriti nga vagoni ndodhej qindra kilometra larg shtëpisë, pa para dhe pa ditur se kujt ti kërkonte ndihmë. Endej nëpër rrugë, deri në momentin që një familje e adoptoi, duke i ndërruar emrin nga Lan Junjun në Jiang Ming.
Familja adoptive e rriti si ta kishte fëmijën e tij të vërtetë, me shumë dashuri, por fëmija, i cili rritej me kalimin e viteve, nuk arrinte të harronte shtëpinë e tij të largët dhe emrin e së ëmës.
Ditën e festës së nënës, ai vendosi ti kërkonte ndihmë policisë për të plotësuar copëzat e zbrazëta në jetën dhe zemrën e tij. “Sot është festa e nënës, – shkruan ai në sajtin në internet të forcave të rendit,- dhe pasi kam lexuar komentet e përdoruesve të tjerë të rrjetit për nënat e tyre, kam ndier mungesën e nënës sime. Doja ti kërkoja policisë të më ndihmonte që të gjeja nënën time, me të cilën jam ndarë prej 29 vitesh. Emri i saj është Deng Shaoxiang”.
Agjentët e policisë kanë nisur hetimet, duke u bazuar tek emri i gruas. Pasi e kanë gjetur, ata tentuan ti tregonin gruas se i biri ishte bërë i gjallë. Deng, tashmë një zonjë 63 vjeçare, nisi të qajë. Takimi i tyre ndodhi në shtëpinë e nënës, në atë shtëpi nga e cila Jiang ishte larguar 29 vite më parë.
“Mendoja se nuk do të më jepej më mundësia të takoja tim bir në këtë jetë”,- tha gruaja mes lotësh. Nga ana e tij, Jiang tregoi se nuk kishte tentuar kurrë të gjente të ëmën, nga frika e lëndimit të prindërve të tij adoptivë. “Tani duhet të përballem me ta dhe ata me këtë situatë. Do të ulem dhe do tu tregoj gjithçka që ka ndodhur. Jam i sigurt se do të më kuptojnë. Ata janë familja ime. Më kanë rritur me shumë dashuri dhe unë jam djali i tyre u vetëm. Tani do ti dua më shumë se më parë, por e dija se nëna ime biologjike ishte rreth të 60-ave dhe nuk mund të priste më gjatë për të më takuar sërish”,- ka thënë djali./tesheshi.com/
