Ish-sekretarja amerikane e Shtetit ka dalë bindshëm fituese në votimet në Karolinën e Jugut, duke u dhënë një tjetër goditje shpresave të senatorit të Vermontit, Bernie Sanders, për të qenë ai kandidati i demokratëve në zgjedhjet presidenciale.
Kjo është fitorja e tretë e Clinton-it në katër votimet e kryera në shtetet amerikane. Ajo fitoi më herët në Ajova dhe në Nevada, e humbi ndaj Sanders-it në Nju Hempshër.
Me thuajse të tërë votat të numëruara, ajo ka kryesuar thellë në Karolinën e Jugut, me 73 për qind të tyre në favor të saj.
Kundërshtari i saj, senatori Bernie Sanders, e përgëzoi menjëherë, duke premtuar gjithashtu ta vijonte përpjekjen e tij. “Kjo fushatë është vetëm fillimi,” do të thoshte ai.
“Ne siguruam një fitore vendimtare në Nju Hempshpër. Ajo siguroi një fitore vendimtare në Karolinën e Jugut. Tani është radha e Super të Martës.”
Hillary Clinton, nga ana e saj, do të shprehej përmes një mesazhi, “Për Karolinën e Jugut, për vullnetarët në zemër të fushatës sonë, për mbështetësit që i japin fuqi asaj: faleminderit!”
Ndërkaq, një turmë që e priste për fjalën e përshëndetjes thërriste: “Eshtë koha, është koha, është koha për një grua në Shtëpinë e Bardhë.”
Përpara janë votimet e Super së Martës, ku do të votohet në një mori shtetesh e territoresh. /tesheshi.com/
