Të martën, ministri i Jashtëm gjerman Heiko Maas i tha kryeministrit të Kosovës Albin Kurti se dialogu midis Kosovës dhe Serbisë mbi normalizimin e marrëdhënieve është thelbësor për perspektivën evropiane të vendeve të Ballkanit Perëndimor.
Maas pati me Kurtin një bisedë telefonike, njoftoi Ministria gjermane e Punëve të Jashtme në rrjetin social Twitter.
“Për Gjermaninë, përparësia kryesore është të sigurojë përparim në sigurimin e një perspektive evropiane për vendet e Ballkanit Perëndimor,” tha Ministria në Berlin.
“Dialogu mbi normalizimin e marrëdhënieve midis Kosovës dhe Serbisë, i ndërmjetësuar nga Bashkimi Evropian, mbetet vendimtar për këtë qëllim.”
Ministrat e jashtëm të BE diskutuan në Bruksel të hënën angazhimin më të fortë politik të BE me partnerët në Ballkanin Perëndimor, “shfrytëzimin e potencialeve të përbashkëta, partneritet për të përmbushur sfidat globale”.
Dokumenti përgatitor për sesionin ministror të BE thotë se do të konsiderohet se si “të formohet një e ardhme e përbashkët brenda BE përmes veprimeve urgjente dhe të përbashkëta”, me qëllim forcimin e bashkëpunimit në fushën e sigurisë.
Ministrat e jashtëm të BE do ta konsiderojnë këtë më tej kur të takohen në formatin “Çështje të Përgjithshme” dhe krerët e shteteve ose qeverive do të diskutojnë në qershor se si të integrojnë marrëdhëniet me Ballkanin Perëndimor në përparësitë strategjike të BE. /tesheshi.com/
