Autoritetet në shtetin amerikan të New Hampshire kanë urdhëruar mbylljen e dy kompanive të lidhura me telefonatat e automatizuara që përdorën inteligjencën artificiale për të imituar zërin e presidentit Joseph Biden për të dekurajuar qytetarët që të votojnë në zgjedhjet paraprake demokrate të shtetit muajin e kaluar.
Prokurori i Shtetit, John Formella, i cili sapo ka filluar hetimin e rastit, u tha gazetarëve se telefonatat “robotike” janë përpjekja më e qartë dhe ndoshta e para e njohur për të keqpërdorur inteligjencën artificiale për të ndërhyrë në zgjedhjet presidenciale të SHBA-së, raporton AP.
Deri në 25,000 votues morën mesazhin e regjistruar dy ditë përpara zgjedhjeve paraprake më 23 janar. Një zë i ngjashëm me atë të Biden shqipton gjithashtu një frazë që ai përdor shpesh dhe pretendon në mënyrë të rreme se votimi në zgjedhjet paraprake do të pengonte votuesit të votonin në zgjedhjet presidenciale në nëntor.
Fushata e Biden vlerësoi hetimin
Thirrjet në mënyrë të rreme u tregonin qytetarëve se ishin nga numri i një organizate që po bën fushatë për Biden.
Organizata e fushatës së Biden vlerësoi hetimin për thirrjet. “Dezinformimi që synon shtypjen e votimit dhe minimin e qëllimshëm të zgjedhjeve të lira dhe të ndershme është një kërcënim i papranueshëm dhe ne përgëzojmë Prokurorin e Shtetit të Nju Hampshire që e ka marrë këtë seriozisht dhe lëviz me shpejtësi kundër përpjekjeve të mëtejshme për të prishur zgjedhjet demokratike”.
Përpjekja e dukshme për të shtypur votuesit duke përdorur “teknologjinë gjeneruese të inteligjencës artificiale” që po përparon me shpejtësi është një shembull i asaj që ekspertët paralajmërojnë se do ta bëjë këtë vit të paprecedentë në dezinformimin zgjedhor në mbarë botën. /tesheshi.com/
