Nga Mensur Krasniqi
Në mënyrë që të mësohet e vërteta e rastit të djeshëm ku gjitha mediet në Maqedoni dhanë informacione mbi helmimin e nxënësve shqiptarë në shkollën e mesme ekonomike “Arseni Jovkov” në Shkup, portali tesheshi.com arriti që ta kontaktojë drejtorin e kësaj shkolle, Nazmi Rahmani.
Sipas tij, asgjë nuk është e vërtetë nga ajo që përçojnë mediumet, meqë nuk bëhet fjalë për helmime të qëllimshme me baza nacionale, pasi që në mesin e viktimave ka edhe maqedonas, boshnjak, turk dhe romë.
“Nuk mund të quhet helmim, kjo ka qenë një rastësi. Kanë qenë dy shokë të klasës të cilët kanë luajtur me një spërkatës, dhe në këtë formë janë dëmtuar edhe nxënësit tjerë, por edhe profesori. Nuk është e mundur të bëhet fjalë për diçka tendencioze ashtu siç shkruajnë mediumet, meqë në këtë klasë ka nxënës të të gjitha nacionaliteteve, si shqiptarë, maqedonas, romë, boshnjak, turk etj”.
Ai shtoi se ekipi ekspertizës nga Ministria e Punëve të Brendshme ka marrë të gjitha monstrat e nevojshme për identifikimin e rastit, duke shtuar: “dhe siç na kanë njoftuar nuk bëhet fjalë për asgjë serioze, meqë mjeti spërkatës që kanë përdorur nxënësit nuk ka efekt të rrezikshëm për shëndetin e tyre”.
Ndryshe, dje edhe zëdhënësja e MPB-së Liza Bendevska ka konfirmuar këtë incident duke thënë se bëhet fjalë për një numër të madh të nxënëvse që janë ankuar nga dhimbjet në disa pjesë të trupit dhe kanë kërkuar ndihmën e mjekut.
“Po, në polici është denoncuar rasti se aty ka ora 18.30 në shkollën e mesme ekonomike “Arsenij Jovkov” në Butel, dhjetra nxënës janë ankuar se kanë vështirësi shëndetësore dhe djegje në fyt. Madje edhe në sy. Menjëher në terren kanë dal ekipet e policisë dhe janë duke i ndërrmar të gjitha masat për ndricimin e rastit”, ka deklaruar zëdhënësja e MPB-së për Qytetin e Shkupit. /tesheshi.com/
