Një ditë pas rrëzimit të helikopterit të ushtrisë shqiptare EC 145 në liqenin e Shkodrës kanë shpërthyer polemika dhe akuza të ndërsjellta.
Kanë qenë disa media, përkatësisht syri.net që ka akuzuar Ministrinë e Mbrojtjes se helikopteri është ulur në doganën e Hanit të Hotit për tu furnizuar apo për të furnizuar një fugon mallrash.
Syri shfaq edhe një video për të ilustruar argumentin që shtron.
Përveç portalit, ka qenë edhe ish-kryeministri Sali Berisha, i cili në faqen e tij në Facebook, i jep jehonë një statusi të reporterit, Elvis Nabolli, sipas të cilit helikopteri po transportonte mermer për shtëpinë e Mimi Kodhelit.
Por, ka qenë i menjëhershëm reagimi i qeverisë dhe i ministres së Mbrojtjes Mimi Kodheli.
Portali i qeverisë transparenca.al hedh poshtë akuzat e portalit syri.net dhe të kryeministrit Sali Berisha, duke i cilësuar si të pavërteta. Në këtë deklaratë theksohet se “helikopteri është nisur nga Farka në orën 12:10 dhe po kryente fluturim rutinë stërvitor rikonjicioni, sipas planit të fluturimit të bazës ajrore Farkë, në intenerarin Farkë-Tujan-Qafë Murr-Qafë Buall-Shupenzë-Peshkopi-Kukës-Qafë Luzhë-Qafë Valbonë-Vermosh-Rapstarje-Koplik-Shkodër-Farkë.
Helikopteri i shfaqur në videon e portalit syri.net është civil, me përmasa më të mëdha dhe pa shenja dalluese të Forcës së Armatosur. Në këtë video gjithashtu dallohet qartësisht se helikopteri është i pajisur me rrota. Ndërkohë që asnjë helikopter i FA-ve nuk është i pajisur me rrota, por janë të pajisur me sistemin me slitë”.
“Sa më sipër aludimet e portalit janë të pavërteta dhe për më tepër dashakeqe. Ftojmë median të distancohet nga abuzimet që nuk ndalen as përpara humbjes së jetës së dy pilotëve të Forcave të Armatosura në krye të detyrës”, vijon reagimi i Ministrisë së Mbrojtjes.
Ndërkaq, ministrja e Mbrojtjes Mimi Kodheli shkon edhe më tej.
“Pa u tharë ende boja e letrës së ngushëllimit që kapot e partisë së baltës u dërguan familjarëve të dy shërbëtorëve besnikë të shtetit, kapot dhe vrasësit e tyre me pagesë të së vërtetës, u vërsulën të hedhin baltë mbi viktimat. Ka një shprehje populli për rastin kur të vinë përbalë krijesa të tilla të errësirës: Të kam lënë Zotin se me ty s’merret dot robi! Ndërsa për këto hiena politike unë mund të them vetëm se i’a kemi lënë popullit sovran të shohë, të dëgjojë e të gjykojë për ta!”.
Shtabi i Përgjithshëm i Ushtrisë bëri të ditur dje se ka ngritur një grup hetimi për rrëzimin e helikopterit ku humbën jetën dy pilotët: Donald Hoxha dhe Floran Deliaj.
Ndërkaq, Komisioni Shtetëror për Dëshmorët shpalli “Dëshmor i Atdheut” dy pilotët e Forcave të Armatosura, që humbën jetën të mërkurën si pasojë e rrëzimit të një helikopteri ushtarak.
Homazhet në nder të tyre do të mbahen të enjten në mesditë, tek Pallati i Kongreseve në Tiranë. Në to do të marrin pjesë oficerë të lartë të Forcave të Armatosura dhe zyrtarë të tjerë.
Ndërkohë, rreth orës 14:30 do të zhvillohet ceremonia mortore tek Varrezat e Dëshmorëve, ku viktimat do të përcillen në banesën e fundit./tesheshi.com/
