Ish-sekretari i përgjithshëm i NATO-s, Havier Solana, njeriu që urdhëroi bombardimin e makinës ushtarake të Milosheviçit, pohoi gjatë një fjale të mbajtur në kryeqytetin spanjoll se, “gjërat në Kosovë kanë ngecur”, ndaj duhet që Beogradi dhe Prishtina të nisin menjëherë bisedimet për kufirin mes tyre.
Solana, duke iu referuar Kroacisë, tha se “ndjenjat nacionaliste marrin disa herë forcë të tmerrshme”, e kërkoi që ky vend t’i përmirësojë marrëdhëniet me Serbinë.
“Komuniteti ndërkombëtar nuk e ka humbur interesin për këtë pjesë të Evropës. Stabiliteti mund të sigurohet vetëm nga marrëdhënie më të mira mes kroatëve dhe serbëve”, deklaroi Solana në Shkollën Diplomatike në Madrid, në konferencën me temë, “Opinione në lidhje me situatën ndërkombëtare”.
“Gjermania e ka favorizuar gjithmonë Kroacinë për shkak të qëndrimeve tradicionale dhe katolicizmit, ndërkohë që Serbia është injoruar. Serbia duhet të bëhet pjesë e BE-së, por diçka e tillë nuk dëshirohet, sepse përmes saj Rusia mund të depërtojë në Europë”, shtoi ai para diplomatëve nga shumë vende të botës.
Solana, anëtar i Partisë Socialiste Punëtore të Spanjës (PSOE), ishte sekretar i përgjithshëm i NATO-s nga 1995-ta deri në 1999-ën, si dhe përfaqësues i lartë për Politikën e Jashtme dhe të Sigurisë në BE nga viti 1999 gjer në vitin 2009.
“Nga lufta në ish-Jugosllavi kemi mësuar se është e nevojshme për të vepruar në mënyrë parandaluese. Vonesat atëherë ishin fatale. Eshtë e nevojshme që më mirë të përdorim policinë e gjyqtarët, sesa të fusim ushtrinë, për të caktuar kufijtë”, u shpreh Solana, i cili ka mbajtur dhe postin e ministrit të Jashtëm të Spanjës në periudhën kohore mes viteve 1992-1995.
Solana, vendi i të cilit është një nga pesë shtetet anëtare të BE-së që nuk e kanë njohur ende Kosovën, deklaroi se, “Kosovës nuk po i dalin mirë gjërat”.
“Kufiri mes Serbisë dhe Kosovës është i paligjshëm, por është kufi, ndaj Serbia është e gatshme për të biseduar. Ne gjithashtu duhet të mbajmë në mend se Shqipëria është një vend i vështirë,” qenë fjalët e tij.
Havier Solana, ish-sekretari i përgjithshëm i NATO-s në kohën kur aleanca bombardoi RFJ-në, në 1999-ën, beson se pozicioni i Spanjës ndaj Kosovës mbetet i palëvizshëm hëpërhë. /tesheshi.com/
