Të bijës së Kadaresë nuk i ka pëlqyer një “intervistë” e Ben Blushit me të atin, duke e trajtuar atë si abuzive.
Fjala është në fakt për një bisedë të çlirët, që të tillë – bisedë – e ka emërtuar dhe Blushi, duke e patur tye libri i tij “41 Sekrete”.
Për të bijën e shkrimtarit, Besianën, ajo është një bisedë e rëndomtë, servirur si intervistë pa dijeninë e tij.
“Duke qenë se plot miq e të njohur më kanë pyetur këto dite nëse Kadareja vërtet i ka dhënë një intervistë Ben Blushit, dua të sqaroj publikisht se Ben Blushi, në fakt, ka krijuar një intervistë pa dijeninë e tim eti, bazuar në një bisedë të rëndomtë private që ka zhvilluar rastësisht ne një kafene me Kadarenë dhe shoqëruesen e tij, A. Bardhyli.
Kohë më pas, Ben Blushi e ka publikuar bisedën në formë ‘interviste’, pa marrë pëlqimin e bashkëbiseduesit, duke abuzuar kështu me besimin që iu akordua, dhe me ‘kurajën’ e çuditshme se po i zbulon publikut shqiptar sekrete të paditura. Një gjest ky sa imoral aq dhe i paligjshëm.
Fatkeqësisht është bërë praktikë tashmë që gjithfarë njerëzish shpresojnë të bëjnë publicitet, duke u përpjekur të shfrytëzojnë në forma te ndryshme figurën e Kadaresë dhe kontaktin me të. Duke pasur parasysh moshën e thyer të tim ati, çdo përpjekje e këtij lloji është vërtet mjerane”, shkruan Besiana Kadare në rrjete.
Kështu, intervistat pikante të Blushit në rol gazetari, një zell i rilindur i tij pas largimit nga politika, marrin një goditje nga aty nga ku s’mund ta ketë pritur kurrë, nga Kadarenjtë.
Në fakt, nuk dihet nëse e bija e ka bërë reagimin me miratimin e të atit. Më korrekte do ishte të dihej nëse vetë shkrimtari është apo hatërmbetës me Blushin, për bisedën e publikuar mes tyre. /tesheshi.com/
