Aeksandar Jabllanoviq, i cili në zgjedhjet e 11 qershorit garon jashtë Listës Serbe, ka hedhur akuza ndaj ish-kolegëve e njëherësh bashkëpatriotëve të tij duke i quajtur si bashkëpunëtorë të Hashim Thaçit, e që për këtë shkak janë të gatshëm të votojnë ushtrinë e Kosovës.
“Vetëm Lista Serbe është ajo e cila është e gatshme të votojë për Ushtrinë e Kosovës. Pjesë e atyre bisedimeve ishin Dalibor Jevtiq, Branimir Stojavnoviq dhe Ljubomir Mariq dhe për këtë ekziston procesverbali. Kush është serbi i Thaçit mund të vërtetohet në evidencën e Kuvendit të Kosovës në lidhje me atë se kush ka votuar për zgjedhjen e Hashim Thaçit për president të Kosovës. Ata këtë e kanë bërë sipas urdhrave të ‘Zyrës për Kosovë dhe Metohi’ dhe të Marko Gjuriqit”, ka thënë Jabllanoviq në një intervistë për KoSSev, që tani mban postin e liderit të Partisë së serbëve të Kosovës.
I pyetur se posedon dokumentin që fakton një gjë të tillë, Jabllanoviq thotë se dokumenti ekziston në Kuvendin e Kosovës.
Por këto akuza i ka hedhur poshtë Dalibor Jevtiq nga Lista. Ai i kundërshton pretendimet e Jablanoviqit duke theksuar se ai “është i prirur për mashtrime”, dhe se pretendimet e tij “nuk meritojnë koment”. Më tej, ai shprehet që për hir të publikut Jablanoviqi duhet të publikojë dokumentin e pretenduar.
“Votimi për zgjedhje të presidentit është i fshehët. Nuk ekziston asgjë që quhet ‘procesverbal se kush dhe si ka votuar. Jablanoviq këtë e di apo nuk e di, prandaj manipulon, apo edhe një herë konfirmon mosdijen e vet politike. Mundohem që mos të hyjë në këtë baltë të tyre”, ka thënë Jevtiq. /tesheshi.com/
