I ka rënë që të jetë kryetar i degës lokale të PD-së në një zonë mjaft të nxehtë, ku partia e tij pak vite më parë bëri historinë. Delvina, një bastion i majtë, dy herë ia besoi pushtetin lokal PD-së, derisa u dorëzua para ish- aleancës strategjike PS-LSI, që e rimorri qytetin e Sabri Godos apo Vasil Melos, me “forcën” e Balilajve rreshtuar krah Metës.
Hari Imeri, arriti gjithsesi që këtë 25 qershor, në ditën më të zezë të partisë së tij, i gjendur mes pushtetit të Balilajve nga njëra anë – LSI-së pra, e një PS-je të fortë me Alket Hysenin si kandidat e Gjiknurin si koordinator fushate i Qarkut Vlorë, që t’i merrte rreth 200 vota më shumë se zgjedhjet e kaluara, pa u investuar aspak, me para jo e jo, por as me ndonjë infrastukturë zgjedhore, duke jua lënë bindjes së gjithsecilit zgjedhjen për ta hedhur votën, bazuar vetëm tek statura e tij qytetare.
Hari përbën një përjashtim si drejtues partie, edhe pse lokal. Ai nuk ka makinë, një mangësi e çuditshme në raport me kohën, vendin ku jeton dhe pozitën që ka. Por mbi të gjitha nuk e ka atë tangërllëkun tipik të provincialit me pozitë, ndonëse është i vetmi që vishet cilësisht, në një qytet ku butiku nuk ekziston as si koncept.
Luan futboll si mesfushor i ekipit të qytetit dhe frekuenton xhaminë. Por mbi të gjitha, mungësia e makinës, e cila nuk është vetëm për arsye ekonomike, reflekton simbolikisht tek ai një thjeshtësi jo-aktoriale që e mban të afërt me njerëzit, gjithnjë mes tyre, pa asnjë lloj diference.
Ende nuk i është besuar pushtet real, për t’i provuar aftësinë drejtuese dhe menaxheriale, por se paku nga pikëpamja etike është një model. Dhe në kushtet kur PD-ja e tij nuk ka patur asnjë pushtet në këto zgjedhje, të humbura të gjitha vitet e fundit, i gjendur siç u cek kryekreje mes dy bajlozëve politikë, Balilajve dhe Ket Hysenit & Damian Gjiknurit, Hari Imeri do ia rriste votat partisë së tij, vetëm falë një njerëzillëku edhe estetik.
Alket Hyseni, tashmë deputet pasi fitoi me një “heroizëm politik” në një enklavë të nxehtë politike të dominuar nga LSI, rezervoi një përshëndetje dhe falenderim të veçantë për të, në fjalimin triumfalist në sheshin e Delvinës. /tesheshi.com/
