Aleanca për Ardhmërinë e Kosovës njoftoi për premtimin që kreu i saj, Ramush Haradinaj, ka dhënë për banorët e zonës kufitare me Malin e Zi. Ai u është zotuar banorëve se nuk do të jetësohet marrëveshja aktuale për demarkacionin me Malin e Zi, por do të korrigjohet e kufiri do të kthehet atje ku qenë gjithmonë.
Në lidhje me demarkacionin me Malin e Zi, në selinë e AAK-së është pritur një grup prej rreth 20 përfaqësuesish të vendbanimeve kufitare me Malin e Zi, të cilët kanë zhvilluar një takim të gjatë me kryetarin e AAK-së, Ramush Haradinajn.
Ata kanë dhënë detaje që u cilësuan të pakundërshtueshme për kompromentimin e procesit të demarkacionit me Malin e Zi.
Njoftimi i AAK-së bën të ditur se “qytetarë të moshuar të kësaj ane, me plot emocion kanë folur për zhdukjen e varrezave të shqiptarëve në Kullë, dhe kanë deklaruar se me marrëveshjen për Demarkacionin, është ndarë Rugova për gjysmë”.
Mesazhi i këtyre përfaqësuesve, të cilët në takim me Haradinajn, kanë deklaruar se flasin në emër të qytetarëve të asaj ane, ishte se pavarësisht prej çmimit që duhet paguar, nuk do të lejojnë që Mali i Zi, siç u shprehen ata, t’iu marrë tokat dhe varret.
“Përfaqësues të kësaj zone kufitare, u kanë bërë thirrje deputetëve, që si të zgjedhur të popullit që janë, edhe t’i mbrojnë interesat e popullit dhe të mos votojnë për ndarjen e Rugovës dhe copëtimin e Kosovës”, thuhet në njoftimin e AAK-së.
Ndërsa lideri i AAK-së, Ramush Haradinaj, u ka thënë banorëve të kësaj ane, se kufiri nuk është çështje partiake dhe se ata duhet të bisedojnë me të gjithë.
Ai u ka premtuar atyre, se do të bëjë të pamundurën që kufiri të caktohet drejt dhe ata që e kanë bërë këtë ngatërresë, krejtësisht të panevojshme, ta marrin dënimin e merituar. “Mjerë ata që i lëçitë populli”, ka thënë Haradinaj./tesheshi.com/
