Ramush Haradinaj paralajmëron autoritetet e Prishtinës të mos vazhdojnë me nismën e përcaktimit të kufirit me Malin e Zi, pasi procesi, sipas tij, është i korruptuar. Me anë të nje letre drejtuar presidentes Jahjga, kryeministrit Mustafa dhe kreut të Kuvendit, Kadri Veseli ai kërkon pezullimin e demarkacionit me Malin e Zi.
“Njëkohësisht kërkoj që të përdorni autoritetin tuaj dhe menjëherë të shkarkoni kryetarin e Komisionit Qeveritar për Demarkacionin e Kufirit, për shkak të keqpërdorimit nga ana e tij të këtij procesi, si dhe përfshirjes së tij në afera korruptive në cilësinë e kryetarit të Agjencisë Kadastrale të Kosovës. Druaj se çështja është tepër e ndjeshme dhe kërkon masa urgjente institucionale”, thuhet në letrën e kreut të AAK-së, Ramush Haradinaj.
Në letër ai sqaron se disponon të dhëna të besueshme se i tërë procesi i lidhur me caktimin e kufirit, bazuar në propozimin e kreut të komisionit qeveritar, “është i shantazhuar dhe rezulton të jetë hartuar mbi bazën e favoreve dhe përfitimeve personale e grupore”. /tesheshi.com/
