Kryeministri i Kosovës Ramush Haradinaj, e ka shfaqur dhe njëherë hapur mosdakortësinë e tij me modelin e sjelljes diplomatike të dyshes së Brukselit Mohgherini – Hahn, duke i akuzuar që të dy si ndjekës të standarteve të dyfishta, ku ndryshe trajtohet Serbia e ndryshe Kosova.
Duke gjykuar mosreagimin e znj. Mogherini ndaj kryeministres Brnabiç, për një letër që kjo e fundit ia dërgoi homologut të Tiranës Edi Rama, më anë të së cilës i kërkonte tërheqje të njohjes së Kosovës, Haradinaj tha: “Ku është Evropa, ku janë ata që nuk reagojnë ndaj Serbisë…Ne na thuhet mos veproni, ndërsa nuk po disiplinohet Serbia”, shtoi shefi i qeverisë së Kosovës.
“Ka shkuar koha kur ne kemi dëgjuar secilin çka na thotë. E vetmja mënyrë e përmbylljes së paqes mes Kosovës dhe Serbisë, e vetmja mënyrë është pranimi i të drejtës së Kosovës”, ka theksuar Haradinaj.
Edhe më parë ai ka akuzuar Mogherinin si shkaktare të prishjes së dialogut mes Prishtinës dhe Beogradit, duke ia lënë gjithashtu autorësinë e korrigjimit të kufijve. Nga ana tjetër, Haradinaj nuk i është bindur dyshes Mogherini – Hahn, për tërheqjen e tarifave doganore ndaj produkteve të importuara nga Serbia. Kur Beogradi ta njohë Kosovën, atëherë po – ka thënë këmbëngulshëm i pari i qeverisjes kosovare. /tesheshi.com/
