Nga Blendi Gashi
Kosova të premten e ardhshme shënon 9-vjetorin e pavarësisë. Padyshim një ditë historike, e pritur me shekuj nga shumë gjenerata.
Por sivjet ashtu edhe si vitin e kaluar, dita e pavarësisë e gjen politikën kosovare të përçarë si kurrë më parë.
Ky përvjetor nuk do mbahet mend vetëm për këtë gjë. Padyshim mungesa e Ramush Haradinajt, komandantit të Dukagjinit që dha shumë për lirinë dhe pavarësinë e vendit që po mbahet “peng” në Francë me një urdhër arrest të Serbisë, do zbeh tej mase këtë festë.
Dhe pikërisht mungesa e tij mund të ngjajë që gjatë këtij muaji të ndodhin shumë të papritura në skenën politike, pasi arrestimi i tij po cilësohet kryekëput politik.
Deputeti Daut Haradinaj, së fundmi në një deklarim për media ka lë të hapur mundësinë që politika kosovare të ketë gisht në arrestimin e vëllait të tij.
“Shpresoj që në arrestimin e Ramushit të mos ketë dorë dikush nga Prishtina”, tha ai.
Andaj, pashmangshëm shtrohet pyetja: nëse shtyrja e vendimit për Haradinajn më 2 mars, a ka diç lidhje me zhvillimet politike që pritet të ndodhin këtë muaj?
Siç dihet ditë, më parë tre krerët e shtetit, presidenti Thaçi, kryeministri Mustafa dhe kryeparlamentari Veseli u takuan në Presidencë nga ku u zotuan se së shpejti do kryhen Demarkacioni dhe Asociacioni.
Dhe pushteti nuk po lë gurë pa lëvizur që këto dy marrëveshje t’i kalojë gjatë shkurtit.
Është kryeministri Mustafa që hapur ka thënë se marrëveshja për demarkimin me kufirin me Malin e Zi duhet të miratohet këtë muaj nga Kuvend, në të kundërtën sipas tij nuk do liberalizohen vizat.
Në anën tjetër, dihet farë mirë se Ramushi është politikani i parë që ngriti zërin ndaj marrëveshjes së Demarkacionit duke paralajmëruar se Kosova me marrëveshjen në fjalë humb territor.
Por Demarkaconi nuk pritet të jetë “befasia” e vetme politike e këtij muaji.
Poashtu do tentohet që të themelohet edhe “Zajednica”, siç e quan opozita Asociaconin e komunave me shumicë serbe. Paraprakisht pritet që javën e ardhshme Lista Serbe të rikthehet në institucione pas pesë muajsh bojkoti.
Kështu kanë bërë të ditur burime të portalit tesheshi. com brenda koalicionit qeverisës.
“Partnerët e koalicionit janë duke bërë çmos që dy marrëveshjet e lartcekura t’i miratojnë gjatë këtij muaji. Ende nuk janë të sigurit nëse i kanë votat por po bisedojnë në vazhdimësi me deputetët e tyre. Siç duket po duan ta shfrytëzojnë edhe mungesën e Ramushit dhe të mundohet të bindin edhe deputetë të partisë së tij, edhe pse vështirë e kanë ta bëjnë një gjë të tillë. Ka gjasa që e kthejnë ratifikimin e Demarkacionit në Kuvend edhe nëse nuk i kanë votat me qëllimin e vetëm të fajësojnë opozitën se po i lë qytetarët pa viza”, thotë burimi.
Një gjë është e sigurt se nëse pushteti tenton me ngulm ratifikimin e marrëveshjeve në fjalë, tri partitë opozitare përmes protestave brenda e jashtë Kuvendit do të kundërshtojnë fuqishëm miratimin e tyre, për çka e kanë paralajmëruar mazhorancën.
Një temë tjetër e ndjeshme që mund të marrë rrjedhë brenda këtij muaji është edhe tentimi për të themeluar ushtrinë por që vështirë se mund të ndodhë kjo për shkak të kundërshtimeve të Listës Serbe, dhe mungesës së votave të tyre.
Duke parë të gjitha këto lëmshe politike, ky muaj ndonëse është më i shkurti i vitit, pritet të jetë më i “nxehti”, në skenën politike dhe këtë e tregon mungesa e Haradinajt dhe institimi i pushtetit për t’i kaluar marrëveshjet që për shtatë muaj fuqishëm i kundërshtoi lideri i Aleancës. /tesheshi.com/
