Nikolla Gruevski po shkon zyrtarisht drejt implikimit penal dhe sipas të gjitha gjasave ai do të shpallet shumë shpejt i pandehur.
Agjencia Birn bën të ditur se Prokuroria Speciale e Maqedonisë dyshon se ish-kryeministri dhe lideri i VMRO-së, Nikola Gruevski ka financuar ilegalisht partinë e tij përmes pastrimit të parave dhe se është përfshirë në raste të shpërdorimit të detyrës në lidhje me një tender autostrade.
Prokuroria Speciale, theksoi për Birn se ka nisur tre hetime të reja, dy prej të cilave kanë liderin e partisë VMRO DPMNE, Nikola Gruevski, si të dyshuari kryesor. Hetimet janë koduar me emrin “Talir” (monedha e vjetër argjendi), “Traektorija” (trajektore) dhe “Trevnik” (lëndinë).
Prokuroria Speciale e Maqedonisë do të kërkojë sekuestro të pasurive në pronësi të ish-partisë në pushtet, përfshirë edhe selinë e saj të re në qendër të Shkupit, për të cilën dyshohet se është financuar dhe marrë në pronësi ilegalisht.
Çështja “Talir”
Në çështjen e parë dhe komplekse, koduar me emrin “Talir”, Specialja dyshon te 11 persona nga VMRO për pastrim parash dhe shpërdorim të detyrës.
Nëntë prej tyre, përfshirë edhe Gruevskin, po hetohen si autorë dhe dy të tjerë si ndihmës. Përveç liderit të partisë, të dyshuarit përfshijnë personat përgjegjës për nënshkrimin e llogarisë si dhe kreun e qendrës së komunikimit të partisë.
Specialja bëri të ditur gjithashtu se e konsideron Gruevskin si të dyshuarin kryesor, duke pretenduar se si kreu i VMRO-së pranoi 4.9 milion euro donacione të paligjshme për partinë e tij nga viti 2009 deri në 2015, kur ai ishte kryeministër.
Hetimi ka treguar se në vend që t’i kthente paratë në buxhetin e shtetit, siç veprohet me donacionet e paligjshme, ai i përdori paratë për të financuar ilegalisht partinë e tij.
Prokuroria Speciale theksoi se dyshonte që paratë u transferuan te 11 persona dhe pastaj u përdorën për të blerë pasuri të paluajtshme, për të paguar shpenzimet e partisë, për akomodimin në hotele, sondazhe popullore dhe zëra të tjerë.
Paratë u përdorën gjithashtu në 78 kontrata për blerje pasurie të patundshme, dhe se disa prej këtyre pronave nuk janë përdorur për qëllime partiake.
Siç bëhet e ditur nga Prokuroria Speciale, kjo e fundit ka dërguar 12 kërkesa në gjykata për të ngrirë të gjitha pasuritë e patundshme.
“Po flasim për 12 kërkesa, (për ngrirje të aseteve) ku secila përmban të paktën tre prona”, tha zv. prokurorja Lence Ristoska.
Prokuroria Speciale dyshon se paratë e paligjshme janë injektuar në llogarinë e VRMO-DPMNE duke përdorur forma të ndryshme të pastrimit të parave.
Disa nga të implikuarit dyshohet se kanë kryer pagesa në llogarinë e partisë, duke i paraqitur paratë si dhurata personale ose si tarifa për anëtarësim.
Prokuroria deklaroi gjithashtu se kishte dëshmi se disa nga fletëpagesat ishin shkruar në të njëjtën shkrim dore dhe janë regjistruar në banka në intervale prej 20-30 sekonda.
Sipas vlerësimeve të Prokurorisë Speciale, për secilin vit, në periudha të caktuara, ish-partia në pushtet merrte 12.000 deri 30.000 euro në ditë në këtë mënyrë.
Prokuroria Speciale ka pyetur mbi 160 dëshmitarë për këtë çështje, ka dërguar 230 kërkesa në institucione të ndryshme dhe ka analizuar 11,886 fletëpagesa të personave në parti.
Çështja “Traektorija”
Në çështjen e dytë, Prokuroria Speciale dyshon se katër persona kanë shpërdëruar detyrën gjatë gjysmës së dytë të vitit 2012 dhe 2013.
Në materialin e saj, Specialja tha se kishte arsye për të besuar se të dyshuarit thyen Ligjin e Prokurimit Publik dhe dhanë një kontratë 155 milionë euro për të ndërtuar dy segmente autostradash te një kompani ndërtimi kineze, pavarësisht faktit se një kompani tjetër kineze paraqiti një ofertë më të ulët.
Gruevski, atëherë kryeministër, përsëri është i dyshuari kryesor në këtë hetim.
Çështja “Trevnik”
Hetimi i tretë lidhet me ndërtimin e dyshuar si të paligjshëm të tri shtëpive të pushimeve në fshatin Zelenikovë, pranë Shkupit.
Hetimi paraprak tregoi se ndërkohë që ndërtimi i këtyre shtëpive filloi në vitin 2011, treshja e të dyshuarve mori lejet e ndërtimit dy vjet më vonë, kur objektet po përfundoheshin.
VMRO i sfidoi këto tre hetime në reagimin e saj.
Sekretari i përgjithshëm, Emil Dimitriev i hodhi poshtë hetimet si “pamflete politike” që kishin për qëllim akuzimin në mënyrë të rreme të partisë dhe udhëheqësit të saj për përfshirje në “disa aktivitete të paligjshme”.
Dimitriev, i cili është ende kryeministër i përkohshëm, tha në një konferencë për shtyp se pretendimet “janë krejtësisht të rreme” dhe se “e gjithë prona e partisë është marrë ligjërisht”.
Prokuroria Speciale e Maqedonisë u formua në vitin 2015 si pjesë e një marrëveshjeje krize të ndërmjetësuar nga BE-ja midis partive politike kryesore dhe u ngarkua me hetimin e akuzave për korrupsion të nivelit të lartë.
Megjithëse VMRO-ja ra dakord të formojë Prokurorinë Speciale, ajo e ka akuzuar atë se punon për Lidhjen Social Demokrate – e cila është në bisedime për të formuar qeverinë e re. /tesheshi.com/
