Në presidencën shqiptare ndizen qirinj, vetëm kur është fjala për të kremtuar Hanuka-n hebreje, atë që njihet si një Festival i Dritave të Lirisë dhe Besimit. Dhe është e katra herë që përfaqësia izraelite në Shqipëri e kremton këtë tek kreu i shtetit.
Për presidentin Nishani, kremtimi me miqtë izraelitë i kësaj feste, duke evidentuar faktin që është sa fetare aq edhe laike, po kthehej në një traditë të përvitshme të miqësisë dhe bashkëpunimit mes dy popujve dhe vendeve.
“Ndër shekuj tiranët dhe despotët e ndryshëm janë rrekur më kot të shtypin e t’u mohojnë njerëzve të lirë të drejtën e dhënë nga Zoti për të ushtruar besimin e tyre, por nuk ia kanë dalë mbanë dhe nuk do t’ia dalin kurrë! Prandaj edhe Hanukaja festohet edhe në Shqipërinë tashmë të lirë e demokratike, sepse me dritën e saj ajo ndriçon jo vetëm përpjekjet e popullit hebre në kërkim të lirisë dhe të vetëvendosjes, por edhe të popullit tonë gjithashtu. Të gjithë ne ndihemi të frymëzuar nga shembulli dhe historia e Hanukas, por mbi të gjitha jemi krenarë, sepse Shqipëria dhe shqiptarët, në kurorën e vlerave të tyre, kanë si margaritarë bashkëjetesën dhe harmoninë fetare mes bashkësive të ndryshme”, u shpreh presidenti Nishani në fjalën e tij.
Më pas, disa nga të pranishmit u përfshinë në ritin e ndezjes së qirinjve së Hanukas, ndër to dhe n/kryetarja e Parlamentit, Valentina Leskaj. /tesheshi.com/
