Provat zyrtare të Çmimit të Madh të Spanjës në Formula 1 kanë dhënë sinjalin për një garë spektakolare nesër.
Britaniku Lewis Hamilton është shfaqur dukshëm i paduruar për t’i dhënë fund mbretërimit të rivalit të tij, Nico Rosberg-ut, gjëja e vetme me të cilin e bashkon tani është makina e njëjtë që pilotojnë: një Mercedes.
Gjermani ka dominuar në fundjavë në provat e lira, në kërkim të një fitoreje të tetë të njëpasnjëshme në garën e nesërme, në kërkim të së pestës fitore në pesë garat e këtij sezoni.
Në fund të provave të sotme ka dalë fitues britaniku, që bëhet gati të përveshë mëngët për betejën e vërtetë, garën e së dielës. Statistikat i japin të drejtë Hamilton-it në dëshirën e tij të çmendur për të dalë i pari në provat zyrtare: nga 25 garat në pistën e Barcelonës, 18 janë fituar nga piloti i nisur i pari.
Rosberg do të jetë i dyti nesër, ku do i duhet të bëjë një nisje të shkëlqyer për të pretenduar një parakalim që në metrat e para, përndryshe do ta ketë shumë të vështirë.
Befasia e vërtetë kanë qenë dy makinat Red Bull, që janë pozicionuar menjëherë pas Mercedes-ëve. Vendi i tretë për australianin Ricciardo, e i katërti për debutuesin me këtë makinë, Max Verstappen-in. Red Bull-i ka turpëruar Ferrari-n me shumë pretendime, duke i lënë pas dy pilotët e kokëkuqes. Raikkonen do të niset i pesti, Vettel vjen nga pas, i gjashti.
Braziliani Massa e pëson nga skuadra, që gabon në përllogaritjen e kohës. Vetëm vendi i 18-të për të, në një garë tërësisht në malore nesër.
Alonso ka vend për t’u mburrur. McLaren-i bëhet më në fund i gjallë. Spanjolli arrin ta rendisë për herë të parë një McLaren në dhjetëshen e parë në provat zyrtare në këtë sezon. Provë e qartë e përparimit të kësaj makine, që nuk është çudi që pas pak javësh të nisë të kërkojë shumë më tepër.
Kjo është dhjetëshja e parë e pilotëve në garën e nesërme: Hamilton, Rosberg, Ricciardo, Verstappen, Raikkonen, Vettel, Bottas, Sainz, Perez dhe Alonso. /tesheshi.com/
