Kandidati për kryeministër nga koalicioni PAN, Ramush Haradinaj ka bërë të ditur se i ka dërguar një letër kryetarit të Vetëvendosje-s, Visar Ymeri, kryetarit të LDK-së, Isa Mustafa, si dhe krerëve të Listës Serbe, me qëllim që deri sot një javë të mbahet seanca konstituive dhe pas saj të mbahet seanca për formimin e qeverisë.
“Për nesër kam propozuar takim me Visar Ymerin dhe Isa Mustafën. Kam propozuar që takimi të mbahet në zyrat e Kuvendit. Nuk do të ndalemi me fol me çdo deputet të zgjedhur të Kuvendit. U siguroj që qeverinë do ta kemi në afat rekord. Si i nominuar përparësi i jap një koalicioni sa më të gjerë”, tha Haradinaj.
Sa i përket takimit me ambasadorin amerikan Greg Delawie, Haradinaj tha se kanë konsulta të rregullta për të biseduar për temat që janë në interes të vendit.
Pas ftesës së Haradinajt ka reaguar deputetja e Vetëvendosje-s, Shqipe Pantina e cila përmes një shkrimi në Facebook thotë se “është jo-parimore dhe e pandershme që deputetët e Kuvendit të konsiderohen thjeshtë numra që i duhen dikujt për t’u bërë kryeministër”.
Ky është dhe sinjali i parë i ardhur nga VV, ndërkohë që ende nuk ka reagime nga LDK. Por ndërsa kjo e dyta e ka ulur pjacën e pretendimeve për të drejtuar qeverinë, si pasojë e rezultatit të dobët në zgjedhje, Vetëvendosje aspiron po ashtu si Haradinaj, me anë të Albin Kurtit, që ta marrë ajo drejtimin e vendit. Ja jep këtë frymëzim e ambicie rezultati pozitiv që arriti në zgjedhje, duke dalë partia e parë për numër votash, ndonë se si koalicion është i pari PAN me Haradinajn kandidat për kreun e qeverisë . /tesheshi.com/
