Bana Alabed, një vajzë 7-vjeçare siriane që ka kapur vëmendjen e botës me mesazhet në Twitter, në lidhje me bombardimin e Halepit, u zhduk nga mediat sociale të dielën.
Mesazhi i fundit që dërgoi në Twitter Bana me nënën e saj, Fatimah ishte kjo parandjenjë: “Ne jemi të sigurt se ushtria do të na kapë shumë shpejt. Do ta shohim njëri-tjetrin një ditë, e dashura botë. Mirupafshim.- Fatemah #Aleppo..”
Llogaria e saj në Twitter është fshirë dhe askush nuk e di përse.
Bana, e cila kishte më shumë se 100.000 ndjekës, ka twittuar mesazhe të tmerrshme përpara, si postimi më 27 nëntor: “Sonte nuk kemi as shtëpi, është e bombarduar dhe kemi mbetur në rrënoja. Pashë njerëz duke vdekur, edhe vetë gati sa nuk vdiqa.”
Në të njëjtën ditë, Bana dërgoi një postim duke kërkuar nga njerëzit që të luten për ta, gjatë kohës sa po zgjatnin bombardimet e fundit. “Nën breshërinë e bombardimeve të rënda tani. Në mes të vdekjes dhe jetës tani, ju lutem lutuni për ne”, tha ajo. Nëna e saj më vonë i tha CNN se shtëpia e tyre mori një goditje të drejtpërdrejtë, duke i lënë në rrugë.
Por llogaria në Twitter mbeti aktive, deri të dielën.
Mesazhi i fundit: “Nën bombardime të rënda tani, nuk ka gjasa të shpëtojmë më. Kur vdesim, vazhdoni të flisni për 200.000 tjerë të ngelur ende brenda. Mirupafshim”!- Fatima.
Bana Alabed (@AlabedBana) 27 nëntor 2016
Nëna e Bana-s e hapi një llogari në Twitter për vajzën e saj, në fund të shtatorit për të “ndarë jetën tonë këtu, me pjesën tjetër të botës”, ndërkohë që ushtria siriane kishte nisë një ofensivë të madhe për të rimarrë Halepin.
Më të habitshmet ishin videot që kapën zhurmën e bombardimeve. Bana foli atë kohë përmes kameras, duke kërkuar ndihmë.
Ata jetojnë në pjesët e kontrolluara nga rebelët në pjesën lindore të qytetit, e cila është epiqendër e bombardimeve të rënda nga regjimi sirian dhe avionët rusë.
Të hënën, mesazhe mbështetjeje janë postuar në Twitter, duke u lutur për Bana-n dhe mbijetesën e familjes së saj.
Muajin e kaluar, postimet e Bana-s zunë syrin e një shkrimtari me famë botërore.
J.K. Rowling i dërgoi Bana-s e-Libra nga seria Harry Potter, pasi vajza e re kishte postuar që ajo pëlqen të lexojë libra “me qëllim që ta harrojë luftën.”
Përkundër disa armëpushimeve, konflikti në Halep është intensifikuar në javët e fundit, ku me qindra e mijëra njerëz të detyruar të largohen nga qyteti.
Trupat siriane të mbështetura nga persona të armatosur të milicisë besnike të presidentit Bashar al-Assad kanë hyrë në Halepin lindor të shtunën, dhe kanë marrë nën kontroll pjesën verilindore, gati 20 përqind. /tesheshi.com/
