Komisioneri i BE-së për Politikat Evropiane të Fqinjësisë dhe Negociatave për Zgjerim, Johannes Hahn, tha sot në Prishtinë se beson që deri në fund të vitit Komisioni Evropian do të mund të rekomandojë se Kosova i ka plotësuar kriteret për liberalizimin e vizave.
Ai në një konferencë të përbashkët për media me kryeministrin, Isa Mustafa tha se konkludimet fillestare tregojnë se Kosova ka arritur progres të dukshëm.
Hahn u shpreh se nuk mund të japë me saktësi ndonjë periudhë kur mund të lëvizin lirshëm qytetarët e Kosovës, por deklaroi se duket shumë premtuese synimi i KE-së që deri në fund të vitit t’i dorëzojë Këshillit Evropian rekomandimin pozitiv për vizat.
Ai nënvizoi se liberalizimi i vizave nënkupton se 28 vendet e BE-së duhet të kenë qëndrim pozitiv rreth kësaj çështje.
Nga ana e tij, Kryeministri Isa Mustafa bëri me dije se Kosova ka përmbushur të gjitha kriteret e kërkuar për liberalizimin e vizave. Ai tha Kosova pret që deri në fund të vitit të ketë
rekomandim pozitiv për çështjen e vizave./tesheshi.com/
