Gazeta me ndikim izraelit Haaretz ka kontestuar punën gazetareske të kanalit saudit Al-Arabiya, duke publikuar, sipas këndvështrimit të saj, qëndrimet pro-izraelite të Al-Arabiya-s në botën arabe. Analiza titullohet: “Është një kanal sionist: a e ndryshoi 7 tetori Al Arabiya-n?”
Në analizën e saj, Haaretz zbulon se Izraeli bashkëpunon me kanalin Al Arabiya për të përcjellë mesazhe pro-izraelite për publikun arab.
Gjithashtu, Haaretz e përshkruan Al-Arabiya-n si një alternativë ndaj zërave anti-izraelitë në mediat arabe për shkak të politikave të vendosura nga princi saudit i kurorës, Mohammed bin Salman, dhe konfirmohet se kanali promovon narrativën e entitetit pushtues.
Me opinionin publik botëror që kthehet kundër Izraelit për luftën e shfarosjes në Gaza, bota arabe ngjan të mbështesë Izraelin në agresionin e tij, pikërisht nga media të tilla.
Ndaj, një aleancë e quajtur “Forcat kombëtare dhe islame palestineze” kanë dënuar ashpër aktivitetet pro-sioniste të kanaleve saudite Al-Arabiya dhe Al-Hadath, pretendon Haaretz.
“Forcat kombëtare dhe islame palestineze dënojnë politikën e kanaleve Al-Arabiya dhe Al-Hadath, politikë që i ktheu këto dy kanale në zëdhënëse të pushtimit sionist, sepse këto dy kanale jo vetëm që përcjellin historinë sioniste dhe justifikojnë pushtimin, ato gjithashtu i shpallin luftë mediatike të gjitha forcave të rezistencës që nga fillimi i luftës në Gaza, deri në atë masë që gazeta sioniste Haaretz theksoi vazhdimisht rëndësinë e kanalit Al-Arabiya për Izraelin”, thuhet në fillim të një njoftimi për shtyp të kësaj aleance politike palestineze.
Forcat kombëtare dhe islame palestineze i bëjnë thirrje publikut arab, si dhe politikanëve, aktivistëve dhe analistëve politikë arabë që të bojkotojnë kanalet e lartpërmendura saudite që kërkojnë të përhapin gënjeshtra në botën arabe përmes propagandës psikologjike të formuluar nga duart sioniste.
Forcat kombëtare dhe islame palestineze u bëjnë thirrje gjithashtu të gjitha palëve në territoret palestineze në Bregun Perëndimor dhe në Rripin e Gazës që të tërheqin licencat e funksionimit të kanaleve të përmendura dhe të ndalojnë punën e tyre, si dhe i bëjnë thirrje Odës së Avokatëve që të ngrenë akuza në gjykatat speciale kundër Al-Arabiya-s dhe Al-Hadath-it, sepse janë, thonë ata, “partnerë në luftën e gjenocidit kundër popullit palestinez”.
“Forcat kombëtare dhe islame palestineze i dërgojnë një thirrje të veçantë mbretit saudit Salman bin Abdulaziz, që të lëshojë direktiva për të rishikuar politikën editoriale të kanaleve të sipërpërmendura, e cila është armiqësore, jo vetëm ndaj popullit tonë palestinez dhe kauzës së tij, por edhe ndaj kauzave arabe dhe islame”, thuhet në deklaratë. /tesheshi.com/
