Guvernatori i Bankës së Shqipërisë, Genti Sejko, deklaroi se gjendja e sistemit bankar në Greqi nuk ndikon në sistemin bankar në Shqipëri.
“Rritja ekonomike pritet të vijë në përmirësim gjatë pjesës së dytë të vitit 2015 dhe në vitet në vijim. Rritja ekonomike e vitit 2015 pritet të jetë më e lartë se rritja e ekonomike e vitit 2014”,- tha Sejko.
Ndërsa foli për situatën në Greqi, Guvernatori i Bankës u shpreh se prania e kapitalit grek në sistemin bankar shqiptar është në nivelin 15%, pra, ka shënuar një ulje në krahasim me disa vite më parë.
“Situata tregon se sistemi bankar shqiptar nuk është i ekspozuar nga investimet publike greke. Ndërprerja e përkohshme e funksionimit të sistemit bankar në Greqi nuk ndikon as në mënyrë të drejtpërdrejtë e as në mënyrë të tërthortë në funksionimin e sistemit bankar në Shqipëri”,- tha z. Sejko.
Ai bëri me dije se po monitorohet situata brenda dhe jashtë vendit. Sejko siguroi se sistemi bankar në Shqipëri gëzon shëndet të plotë, ndërsa shtoi se vendi ynë nuk ka probleme likuiditeti.
Sipas Guvernatorit, bankat me kapital grek janë të sigurta në tregun shqiptar./tesheshi.com/
