Grupimi i ashtuquajtur “Për PD-në”, kërkoi sot me anë të një deklaratë për shtyp largimin e Lulzim Bashës nga drejtimi i Partisë Demokratike.
Sipas tyre, largimi i Bashës do t’i hapte rrugë ringritjes së PD-së.
“Jemi të vetëdijshëm se përgjegjësia për zgjedhjet është përgjegjësi politike e drejtuesve të lartë të partisë. Në politikë një drejtues mban përgjegjësinë e dështimit, pavarësisht nga arsyet e dështimit.
Kryetari i PD dhe drejtuesit e lartë të partisë duhet të marrin përgjegjësi për këtë humbje kaq të rëndë. PD ka shembull të një sjelljeje politike dhe qytetare. Z.Sali Berisha dhe drejtues të lartë të saj morën përgjegjësinë dhe vendosën një standard.
Largimi, dorëheqja e parevokueshme e z.Basha jo vetëm nuk është fundi i PD-së por është fillimi i ringritjes së saj. Ai i detyrohet partisë”, thuhet ndër të tjera në deklaratë.
Ata gjykojnë se një ndër gafat e Bashës qe djegia e mandateve dhe bojkoti i zgjedhjeve lokale.
“Dalja nga parlamenti i dhuroi PS-së hapësirën mediatike dhe shesh betejën politike. Për më tepër dalja nga parlamenti lejoi hyrjen në parlament të listës së PD-së që rezultoi e shitur dhe se ishte përzgjedhur në mungesë të plotë të përgjegjësisë politike të LB. Me ta u krijua një shumicë kushtetuese nga PD që bëri të mundur epërsinë e saj me ligj. Partia Demokratike u bë e parëndësishme institucionalisht”, u tha në deklaratë.
Në grupimin “Për PD-në” bëjnë pjesë Bujar Nishani, Arben Imami, Edith Harxhi, Arben Ristani, Edvin Kulluri, Ibsen Elezi, Endira Bushati, Bislim Ahmetaj, Indrit Hoxha. /tesheshi.com/
