Pas Likovës hapet një vatër e re krize në Maqedoni dhe policia speciale ka rrethuar fshatin Malinë të Karadakut të Shkupit. Banorët e fshatit shprehen se ndodhen të terrorizuar dhe nuk kanë asnjë kontakt me jashtë për të vegjlit dhe të moshuarit.
“Jemi të rrethuar nga forcat policore. Janë futur nëpër oborret e shtëpive të fshatit i gjith fshati është përplot me transporterë policorë, kurse po i vërejmë edhe në malet përreth. Nuk e kemi të qartë a na i dërgoi policët Jankullovska, apo Ali Ahmeti. Këtë duam ta dimë”, deklaroi për “Lajm” banorja e këtij fshati, Ganimete Saliu.
Ajo thotë se deri tani nuk janë dëgjuar të shtëna armësh e as shkëmbim zjarri. Mirëpo frika te banorët është evidente. “Policët janë të armatosur deri në dhëmbë. Helikopterët fluturojnë pandërprerë. Më së tepërmi po frikësohen fëmijët, mirëpo tensioni është prezent edhe te banorët tjerë” shton ajo.
Banorët thonë se ndërhyrja e policisë në këtë fshat është i panevojshëm. “Deri sot gjithcka ka qenë qetë. Nuk ka pasur asnjë lëvizje të dyshimtë. Ne jemi njerëz hallexhinj, që mundohemi të nxjerrim kafshatën e bukës, sepse askujt nuk i intereson për fatin tonë”, vazhdon të flasë Ganimetja me zë të dridhur përderisa dëgjohet zëri i helikopterëve që fluturojnë mbi këtë fshat, në kufirin Maqedoni Kosovë
Banorët e Malinës dhe Karadakut të Shkupit kanë kërkuar tërheqjen e njësiteve speciale policore. Njësitet e policisë speciale vazhdojnë të qëndrojnë në fshatrat Malinë dhe Brezë. Por njëkohësisht ata kanë kërkuar që në këtë zonë të shkojnë dhe të japin sqarime zyrtarët më të lartë të Qeverisë si Musa Xhaferi dhe Zemri Qamili.
“Apelojmë që të tërhiqen. Nuk e dijmë se çfarë kërkojnë dhe po na shqetësojnë fëmijët. Pse po ndodhë vetëm tek ne kjo situatë dhe kush po dëshiron të luaj me zjarr. Kërkojmë urgjentisht të vijnë këtu zëvendëskryeministri Musa Xhaferi dhe zëvendësministri i brendshëm Zemri Qamili, për të na informuar se çka duan këta këtu. Ju lutem ky maltretim nuk tolerohet se ne boll kemi vuajtur”, ka apeluar për INA, një banorë i Malinës.
Banorët kanë theksuar se njësitet speciale nga orët e para të mëngjesit po vazhdojnë kërkimet e tyre në këtë zonë, ndësa atyre nuk i është thënë asgjë lidhur me operacionin. Disa media proqeveritare kanë raportuar se gjatë operacionit janë gjetur gjoja armët e grabitura gjatë sulmit të grupit të armatosur në postën policore kufitare në Gushincë të Likovës.
Zëdhënësi i MPB-së Ivo Kotevski njoftoi se policia që prej orëve të para të mëngjesit ka bastisur disa shtëpi në këtë fshat e cila është në afërsi të Gushincës, ku u sulmuar kulla policore një javë më parë. Informatat paraprake nga policia thonë se është gjetur një pjesë e armëve të vjedhura gjatë sulmit në Gushincë, për të cilat policia nuk pati njoftuar më parë në konferencën për media. MPB-ja njoftoi vetëm mbi skenarin e ndodhisë dhe mesazhet që kanë lënë sulmuesit, por nuk tregoi se policia ka humbur sasi të madhe armatimi.
