“Çdo parti që do të sjellë vendime për formim të koalicionit pa partinë që ka fituar shumicë votash dhe mbështetje më të madhe të popullit në zgjedhje, duhet ta dijë se në të njëjtën kohë sjellë vendim që të përballet me probleme në të ardhmen, pasi që e injorojnë vullnetin e shumicës së qytetarëve”. Ky është qëndrimi i liderit të VMRO-së, Nikolla Gruevski, të cilin e ka bërë të ditur në takimin me ambasadoren e OSBE-së në Maqedoni, Nina Suomalainen, në pyetjen se nëse LSDM-ja formon qeveri, a do të jetë e pranueshme për VMRO-në.
Në deklaratën e e partisë thuhet se në nënvizimin e ambasadores se “ekzistojnë shtete ku ka ndodhur që partia fituese e zgjedhjeve të mos hyjë në koalicion qeveritar”, nga VMRO-DPMNE kanë thënë se në dhjetë vitet e fundit “prej brenda dhe prej jashtë vazhdimisht është potencuar se Maqedonia është rast i veçantë, i cili e ka specifikën e multietnicitetit dhe se ajo situatë veçmas është e rëndësishme që partia fituese te votuesit shqiptarë të bëjnë koalicion me partinë fituese te partia maqedonase”.
“Tani VMRO-DPMNE-ja është fituese dhe prej brenda dhe prej jashtë harrohet ai parim. Të gjithë e dinë se nëse një herë shkelet parimi, i njëjti më nuk do të kthehet. Pasi që nuk mundet më të vlejë parimi sipas nevojës, vetëm kur dikujt i konvenon”,vijon kështu deklarata e VMRO-së.
Takimi, ashtu siç theksojnë nga partia e Gruevskit, ka qenë me kërkesë të ambasadores’ ndërkaq bashkë me Gruevskin në takim kanë qenë prezentë edhe deputetët Vlladimir Gjorçev, Aleksandar Nikollovski dhe Nikolla Poposki.
Në lidhje me formimin e koalicionit, nga VMRO-DPMNE kanë theksuar se kërkojnë zgjedhje të parakohshme parlamentare për shkak të dallimit të ngushtë të dy partive që kanë fituar më shumë mandate. Nga kjo parti gjykohet se të njëjtat do të ishin mbajtur bashkë me zgjedhjet lokale, në pjesën e parë të muajit maj, por kjo do të mundet të diskutohet me partitë nëse ka vullnet, dhe jo frikë nga zgjedhjet ashtu siç demonstroi LSDM-ja.
Rreth kërkesës për ndryshim të rregullores për gjuhët, lideri i partisë ka thënë se “VMRO-DPMNE nuk pajtohet që të zbatohet parimi i dygjuhësisë në tërë territorin e Maqedonisë jo për atë se është kundër gjuhës shqipe ose shqiptarëve të Maqedonisë, por për atë se ajo nuk do të reflektonte me realitetin demografik në shtet”. /tesheshi.com/
