Përgjimet telefonike sensacionale të publikuara nga lideri i opozitës në Maqedoni, Zoran Zaev, përveç se kanë pështjelluar shoqërinë, duket se po japin një efekt të parë politik, që është menduar nga Kryeministri Nikolla Gruevski. Këto orë po flitet vazhdimisht për riformatimin e qeverisë aktuale.
Kjo bëhet e ditur edhe nga mediat pranë qeverisë, të cilët bëjnë të ditur se ka pasur edhe presione ndërkombëtare.
Siç shkruan gazeta “Utinski”, në listën e zyrtarëve të parë që do të shkarkoheshin do të ishin ministrja e brendshme Gordana Jankullovska dhe ministri i shëndetësisë, Nikola Todorov.
Kryeministri Nikola Gruevski javën e kaluar i pyetur nga deputetët se a do të jap dorëheqje ministrja e brendshme pas aferës së përgjimeve deklaroi se duhet të shihet se çfarë ka ndodhur, cilët janë analizat dhe më pas të sillet vendim.
Gruevski nga ana tjetër ka përjashtuar çdo mundësi për dorëheqjen e tij. Në kuadër të këtyre ndryshimeve gazeta përmend edhe ndërrimin e kryetarit të Parlamentit, Trajko Veljanovski dhe se siç thuhet nuk përjashtohet mundësia që ky post ti takojë partisë shqiptare BDI. Sipas gazetës, në BDI ndër ministrat që do të jenë në listën e atyre që duhet ndërruar janë ministri i arsimit, Abilaqim Ademi dhe nuk përjashtohet edhe mundësia e largimit të ministrit të ambientit jetësor, Nuran Izairi. Edhe kjo javë pritet të jetë vendimtare lidhur me zhvillimet aktuale dhe tensionet në skenën politike.
