Në ditën e konstituimit të Kuvendit dhe zgjedhjes së kryetaparlamentarit, ish-kryeministri dhe lider i VMRO-së, Nikolla Gruevski është larguar nga Maqedonia dhe ka shkuar në Maltë. Sipas partisë së tij, Gruevski do të marrë pjesë në Kongresin e Partive Popullore Evropiane.
Po ashtu ata thonë se Gruevski në Maltë do të prezantojë qëndrimet në lidhje me zhvillimet aktuale politike si dhe interesat strategjike të Maqedonisë.
Mirëpo nga LSDM, kjo mungesë e rivalit politik kuptohet ndryshe. Nga kjo parti, siç thuhet, nuk mund të kuptohet se si është e mundur që në momente të krizës politike, ku Gruevski duhej të ishte prezent për të mbrojtur interesat shtetërore, ai ka zgjedhur vizitë zyrtare në cilësinë e liderit partiak dhe jo të ndonjë funksionari shtetëror.
“Me ikjen e sotme nga Maqedonia, Nikolla Gruevski edhe njëherë dëshmoi se nuk i intereson shteti, por e rëndësishme për atë është që të ikë nga përgjegjësia. Në ditën kur Maqedonia duhet të zgjedh kryetarin e ri të Kuvendit, Gruevski u largua nga shteti duke dëshmuar se interesat shtetërore nuk janë me rëndësi”, thuhet në deklaratën e partisë së Zaevit.
Me të njëjtën mënyrë gjykohet dhe ikja e presidentit Ivanov dy javë më parë në Azerbejxhan, që sipas LSDM-së dëshmon se ata nuk kanë minimum ndjenja për shtetin. /tesheshi.com/
