Mënyra sesi Europa menaxhon fluksin e refugjatëve është emblemë e një krize më të thellë në kontinentin që ka harruar vlerat thelbësore. Ish-kryeministri grek Aleksis Cipras duket nuk ka harruar retorikën që e solli në pushtet vetëm në janar të këtij viti, e që grekët e dërrmuar nga masat e kursimit duket se e pëlqejnë.
Cipras sulmoi në ditën e fundit përpara se të zhvillohen zgjedhjet e së dielës mënyrën europiane të përballimit të krizës së refugjatëve, ndërsa Greqia është porta më e madhe hyrëse e qindra mijë njerëzve që largohen nga konfliktet në vendet e tyre.
“Kur Mesdheu është shndërruar në një varr masive dhe deti Egje po nxjerr fëmijë të mbytur në brigjet e tij, koncepti i parë i një Europe të bashkuar është në krizë, sikundër është kultura europiane”, theksoi Cipras gjatë një tubimi të fundit të fushatës në Athinë.
Të majtët sipas sondazheve qëndrojnë “kokë më kokë” me të djathtët e Demokracisë së Re në zgjedhje. Cipras u shndërrua në heroin e Greqisë ndërsa mbrojti pozicionin e vendit të tij kundër detyrimeve europiane për paketën e shpëtimit financiar. Ai e përshkoi krizën mes Greqisë dhe BE si një krizë ideologjike të lakmisë kapitaliste kundër mirëqënies publike.
Cipras paralajmëroi refugjatët që e kanë Greqinë vend tranzit për në vende të tjera europiane, se duhet të marrin në konsideratë se ku po shkojnë, “Europa ku një bukëpjekës në Kos shpërndan ushqim për refugjatët apo Europa e kryeministrit hungarez që ndërton gardhe e qëllon me plumba”.
“Nëse Europa e bashkuar respekton vetëm rregullat e disiplinës fiskale dhe braktis vendet anëtare të kriza madhore, kjo nuk është Europa e themeluesve dhe as mund të ketë një të ardhme”, tha Cipras. /tesheshi.com/
