Nuk do të ketë deri të premten dërgim të refugjatëve të tjerë nga toka helene drejt Turqisë. E ka pohuar këtë një zyrtar turk, pa dhënë hollësi të mëtejshme mbi arsyet e kësaj shtyrjeje.
Greqia e nisi të hënën shpërnguljen e refugjatëve drejt Turqisë në bazë të marrëveshjes që kjo e fundit ka arritur me Bashkimin Europian.
Grupi i parë i refugjatëve që u mbartën për në Turqi të hënën ishin përgjithësisht afganë dhe pakistanezë, në kuadër të kthimit të të gjithë refugjatëve që e kalojnë ilegalisht Egjeun.
Po dje nisi dhe risistemimi i sirianëve në Europë, si pjesë e së njëjtës marrëveshje. Refugjatët e parë sirianë arritën në Gjermani nga Stambolli dhe u vendosën në Hanovër. Të tjerë prej tyre do të gjejnë vend në Finlandë dhe në Holandë.
Edhe pse plani ka ndeshur në kundërshti, duket se nuk do të ketë pengesa për vijimin e tij. /tesheshi.com/
