Në pak orë, duke nisur që nga pasditja e së hënës, presidenti Meta i ka kthyer qeverisë tre ligje duke mos ia dekretuar.
Fillimisht, kreu i shtetit ktheu ligjin “Për një ndryshim në ligjin nr. 9900, datë 10.4.2008, për rezervat materiale të shtetit”.
Ligji “për rezervat materiale të shtetit”, u miratua më 20 qershor.
Në arsyet e kthimit të ligjit, Presidenti Meta deklaron se nisma ligjore për ndryshimin e nenit 10, pika 1 të ligjit nr. 9900, datë 10.4.2008, “Për rezervat materiale të shtetit” është e pajustifikuar.
Më tej vijoi me ligjin “Për disa shtesa në aktin normativ, me fuqinë e ligjit, nr. 4, datë 9.7.2008, të Këshillit të Ministrave”, “Për privatizimin dhe dhënien në përdorim shoqërive tregtare dhe institucioneve shtetërore të ndërmarrjeve apo objekteve të veçanta, mjeteve kryesore dhe mjeteve të xhiros së këtyre ndërmarrjeve”, i miratuar më 20 qershor.
Në argumentimin e presidentit thuhet se “ky ligj, i paraqitur për shpallje, është një nisëm ligjore e nxituar, jo e plotë dhe fryma e këtij ligji shkon në kundërshtim me kuadrin ligjor aktual në fuqi.”
Ligji tjetër i kthyer nga Meta është ai “Për disa shtesa dhe ndryshime në ligjin nr. 139/2015 “Për vetëqeverisjen vendore”, gjithashtu shoqëruar me arsyetimet përkatëse.
Këto raste të fundit janë pasqyrim i krizës mes Presidentit dhe Kryeministrit, ku i pari, prej sa është në krye të shtetit, e ka bërë rutinë mosdekretimin e ligjeve që i vijnë nga qeveria.
Në krye të tyre, si raste ta paprecedenta janë mosdekretimi i dy ministrave, si dhe anullimi i zgjedhjeve lokale të 30 qershorit me dekret. /tesheshi.com/
