Një shpërthim ka goditur mbrëmjen e së martës një autobus në Tuniz, i cila mbartte rojet presidenciale. 12 është numri i të vrarëve nga ky shpërthim, e 17 janë të plagosurit. Ministria e Brendshme nuk ka vonuar ta cilësojë shpërthimin një akt terrorist.
Presidenti i Tunizisë, Bexhi Kaid es-Sebsi, ka reaguar menjëherë, duke shpallur gjendjen e jashtëzakonshme dhe ndalimqarkullimin.
Vendin e ngjarjes e vizituan kryeministri i vendit dhe vartësi i tij, ministri i Brendshëm, teksa pak pas ngjarjes prania e policisë u shtua dhe u bë krejt e dukshme në rrugët e Tunizit.
Rojet presidenciale janë një forcë sigurie elitë, që kanë për detyrë të mbrojnë vetëm presidentin. Niveli i sigurisë ka qenë i rritur gjatë këtyre ditëve në kryeqytetin e Tunizisë, me forca të shumta sigurie të dislokuara në terren, por që gjithsesi nuk e shmangën shpërthimin e mbrëmshëm.
Tunizia është goditur dhe më herët nga sulme të tilla, siç qe ai i qershorit të këtij viti në një qytet bregdetar, ku njerëz të armatosur hapën zjarr mbi pushuesit, duke lënë dhjetëra të vrarë. Më përpara, në mars, pati një sulm në muzeun Bardo, ku u vranë 22 persona.
Tunizia përballet aktualisht me probleme ekonomike dhe të sigurisë. /tesheshi.com/
