Ish-Presidenti i Afrikës së Jugut Jacob Zuma mori ryshfet më shumë se 700 herë para se të bëhej kreu i shtetit, thanë prokurorët të mërkurën, në fillim të gjyqit të ish-udhëheqësit për korrupsion, raporton AP.
Zuma, presidenti i ekonomisë më të zhvilluar të Afrikës nga viti 2009 në 2018, është akuzuar për raste të shumta korrupsioni, por edhe mashtrim, evazion fiskal dhe pastrim parash. Ai akuzohet, ndër të tjera, për marrjen e një ryshfeti në para nga kompania franceze Tales, e cila prodhon armë.
Ai mohoi akuzat, duke pretenduar se gjyqi kundër tij ishte i motivuar politikisht. Nëse dënohet, Zuma, 79 vjeç, mund të përballet me 25 vjet burg.
Ai të mërkurën kërkoi skualifikimin e kryeprokurorit, për të cilin pretendon se është i njëanshëm.
Një figurë politike në rritje
Pasi gjyqi u shty për në 19 korrik, Zuma u tha qindra mbështetësve para gjykatës se ai “kurrë nuk mori asgjë nga askush” dhe se “nuk bëri asgjë të gabuar”.
Pretendimet për korrupsion kanë të bëjnë me periudhën kur Zuma ishte një figurë politike në rritje dhe me periudhën kur ai ishte zv.president i Afrikës së Jugut, nga 1999 në 2005.
Si pjesë e të njëjtit proces, kompania Tales është gjithashtu në bankën e të akuzuarve, përfaqësuesit e së cilës kanë mohuar fajësinë për akuzat e mashtrimit dhe pastrimit të parave. /tesheshi.com/
