Nga Mensur Krasniqi
“Të shqetësuar dhe dëshpëruar” – Këto janë reagimet e para nga blloku opozitar maqedonas LSDM, pas vendimit të Gjykatës themelore-Shkupi-1, ku i hodhi si të pabaza të gjitha dëshmitë e lëndës mbi përgjimet kundër kryeministrit Nikolla Gruevski, ish-ministres së Punëve të Brendshme, Gordana Jankullovska, ish-drejtorit i Sigurimit dhe Kundërzbulimit Sasho Mijallkov, dhe persona tjerë, sepse sipas Gjykatës, dëshmitë qenkan siguruar në mënyrë të kundërligjshme dhe nuk mund të jenë objekt shqyrtimi.
E gjithë kjo vjen pas padisë penale të parashtruar nga LSDM ndaj këtyre personave zyrtarë.
“Ky është skandal i paparë. Si e para, konform Marrëveshjes së Përzhinos, nëse do kishte Prokurori dhe Gjykatë ashtu siç duhet, jo nën hijen e VMRO DPMNE-së, sigurisht që nuk kishte me ndodh kjo, dhe as që do kishte nevojë për Prokuror Special. Tani ata qëllimisht dëshirojnë të bëjnë që mos të ketë nevojë për Prokuror Special”, thonë nga LSDM.
Për këtë ka reaguar edhe Komiteti i Helsinkit, duke qenë të shokuar nga keqpërdorimi i procedurës nga ana e gjykatësit në procedurë paraprake, dhe nga ushtrimi joprofesional dhe të pandërgjegjshëm të funksionit të tij.
“Gjykatësi në mënyrë të paligjshme është përzierë në punën e Prokurorit publik dhe ka sjellur vendim kundërligjor, dhe si e tillë patjetër duhet të ankimohet nga Prokuroria Themelore Publike-Shkup, e pastaj të përcillet edhe në Gjykatën e Apelit-Shkup.
Ndryshe, dispozitat në të cilat thirret Gjykatësi (Ndarja e dëshmive në lidhje me nenin 12 paragrafi 2 – Ligjshëmria e dëshmive), bëjnë fjalë vetëm në raste kur lënda ka hyrë në procedurë hetimore ose shqyrtim kryesor”, shprehen nga Komiteti Helsinkit.
Marrë parasysh se dokumentet e dëshmive gjykata i ka kërkuar nga Prokuroria, është e qartë se Prokuroria nuk ka sjellë vendim për ngritjen e procedurës hetimore, dhe as që ka kërkuar të sillet asnjë lloj vendimi gjyqësor. Se a janë siguruar legalisht apo jo dëshmitë, sipas Komitetit të Helsinkit, duke u bazuar në LPP, gjykata këtë mund ta konfirmon vetëm në procedurë hetimore ose gjyqësore, dhe jo në procedurë parahetimore(neni 294 LPP). Këtu është i qartë qëllimi që vendimi të bëhet i plotfuqishëm dhe të shkohet sipas nenit 14 të Kushtetutës, sipas së cilit askush nuk mund të gjykohet dy herë për një vepër që është sjellur një herë aktgjykim i plotfuqishëm. Në këtë mënyrë gjithnjë sipas Komitetit të Helsinkit Gjykata do ta anulojë Marrëveshjen politike për emërimin e Prokurorit Special.
Me këtë, seriozisht do të dëmtohen rekomandimet për nisjen e negociatave me Bashkimin Evropian, dhe sundimin e Ligjit në Maqedoni”, thuhet nga Komiteti i Helsinkit.
Ndërkaç, analistët Tito Belicanec dhe Mirjana Najçevska në rrjetin social Facebook kanë shkruar që ky vendim i Gjyqit është dëshmi që nevojitet Prokuror dhe Gjykatë Ndërkombëtare. /tesheshi.com/
