Gjykata Kushtetuese i ka dhënë të drejtë opozitës, e cila një vit më parë kërkoi ngritjen e një komisioni hetimor për uljen e një avioni me mariuanë në Divjakë të Lushnjës, i cili vinte nga Italia.
PD-ja kërkoi në atë kohë ngritjen e një koisioni të posaçëm për këtë çështje por mazhoranca nuk pranoi dhe ngriti një komision për luftën e përgjithshme ndaj narkotikëve. Vendimi i Kushtetuesës është botuar në faqen zyrtare të saj dhe e ka deklaruar si të papajtueshëm më Kushtetutën vendimin e 22 majit 2014 të Parlamentit për rrëzimin e kërkesës së opozitës për ngritje të komisionit hetimor për hetimin e rasteve të trafikut të drogës nga ajri.
Pas rrëzimit të avionit të tipit “Piper” të drejtuar nga piloti italian Girogo Riformatto në plazhin e Divjakës ku u sekuestrua dhe 360 kg kanabis, opozita kërkoi ngritjen e një komisioni hetimor të drejtuar prej saj por me vendim të parlamentit kjo kërkesë u rrëzua.
Asokohe u ngrit një tjetër komision i drejtuar nga deputetja Ermonela Felaj, por sipas gjykatës e drejta kushtetuese që i takon opozitës për ngritjen e një komisioni është shkelur.
Në vendimin e Gkykatës Kushtetuese, thuhet: “referuar kërkesës opozita nuk ka si qëllim përvetësimin e kompetencave të prokurorisë për të ndjekur penalisht apo të kryej hetime për rastin Riformatto.
Më tej sqaron gjykata në pikën 38 të saj, argument i përdorur nga Kuvendi se për këtë rast po kryhen hetime nga prokuroria, është i pabazuar.
E për këtë arsye gjykata ka vendosur pranimin e kërkesës së opozitës për zgjidhjen e kësaj mosmarrëveshje duke shpallur si antikushtetues vendimin e parlamentit.
Aktualisht dosja e trafikut të drogës nga ajri ku i proceduar është dhe piloti italian Girogo Riformatto i ulur me avionin e tij në plazhin e Divjakës po gjykohet nga krimet e rënda dhe pritet që në shtator të ketë një vendim për këtë çështje, aty ku të pandehur janë dhe 4 shtetas shqiptar.
/tesheshi.com/
