Për Ala dhe Xhemal Mubarakun, dy djemtë e ish-presidentit egjiptian, Hosni Mubarakut, është lëshuar urdhri për lirim nga burgu.
Një gjykatë egjiptiane ka urdhëruar nxjerrjen e tyre në liri ngase ata e kanë plotësuar dënimin trevjeçar për korrupsion.
Dy vëllezërit qenë dënuar për korrupsion, saktësisht për përvetësim të fondeve publike.
Mubaraku dhe djemtë e tij u arrestuan në vitin 2011. Një gjykatë do t’i dënonte me nga tre vite burg për përvetësimin e 125 milionë paundëve egjiptianë, diku te 16 milionë dollarë, prej fondeve për mirëmbajtjen e pallateve presidenciale.
Ata do të liroheshin për një kohë të shkurtër në janar, pas përfundimit të kohës së paraburgimit, për t’u arrestuar përsëri në maj, kur u dha vendimi.
Ndërkohë, të dy djemtë e Mubarakut po gjykohen në një gjyq më vete edhe për akuzën për manipulim të tregut të aksioneve.
Vetë ish-presidenti gjendet në një spital ushtarak më Kajro, e po përballet gjithashtu me një rigjykim për bashkëpunim në vrasje të protestuesve gjatë revoltës së vitit 2011. /tesheshi.com/
