Nga Blendi Gashi
Kryevetëvendosësi Visar Ymeri, të hënën, pas mbledhjes maratonike prej 7 orësh ku u diskutua për skandalin në këtë parti, në një deklaratë të shkurtër për media kërkoi nga aktivistët dhe anëtarësia të ndalin gjuhën e përdorur ndaj zyrtarëve të partisë, kjo pasi plasën reagimet “pro et contra” Albin Kurtit e Aida Dërgutit, por jo vetëm.
“Kryesia njëzëri e dënon dhe e quan të papranueshme gjuhën e përdorur karshi, veçanërisht figurave publike të Lëvizjes Vetëvendosje gjatë kësaj fundjave në rrjetet sociale dhe kërkojmë nga të gjithë aktivistët dhe anëtarësia e Lëvizjes Vetëvendosje që ta ndalin këtë mënyrë të të shkruarit dhe përdorimin e kësaj gjuhe në rrjetet sociale ndaj figurave publike të Lëvizjes Vetëvendosje”, tha Ymeri para gazetarëve.
Megjithatë kjo thirrje e tij fare nuk është duke u dëgjuar as nga zyrtarë të lartë të partisë e as aktivistë të cilët parreshtur po hedhin akuza të ndryshme duke shpërfaq problemet e mëdha që kanë kapluar këtë subjekt.
Njëherit mos respektimi i thirrjes së Ymerit tregon qartë se ai gjatë katër viteve ka qenë vetëm një kryetar formal por assesi një i vërtetë, zëri i të cilit dëgjohet as në situatat më të vështira kur bëhet thirrje për unitet brenda partisë.
Nënkryetarja e zyrtarja për media s’dëgjojnë thirrjet e “shefit”
Hiç më pak se nënkryetarja dhe zyrtarja për media kanë thyer “urdhërin” e Ymerit si dhe aktivistë që kanë dhënë kontribut të çmuar në protestat e mbajtura.
Nënkryetarja e VV-së, Fatmire Mulhaxha – Kollçaku nuk ka përfill thirrjen e “shefit”, pasi një ditë pas kërkesës së tij ka shkruar në Facebook ku ka dalë hapur pro Kurtit, duke thënë se nuk ka nevojë për mbrojtje në organizatë, sepse është i pakontestueshëm nga të gjithë.
“A nuk e tregoi këtë fushata nacionale dhe ajo lokale!? Ai ka nevojë për unitet të organizatës. Ai ka nevojë për të gjithë ne, dhe secilin veç e veç. Unë pashë shumë brengë, shumë sinqeritet, shumë kolegialitet, shumë vullnet për ta çuar organizatën përpara, por edhe shumë nevojë për reflektim nga të gjithë. Unë e di që secili e merr përgjegjësinë për veprimet e veta, por as meritat nuk duhen mohuar. Mos nxitoni. #meAlbinin”, ka shkruar ajo.
Kurse zyrtarja për media Tinka Kurti ka reaguar pas raportimeve se ka qenë ajo e cila ja ka dhënë mesazhin fyes të Aidës televizionit KTV, në të cilën media ka punuar para se të bashkohet me VV-në.
Ajo këtë e ka quajtur shpifje dhe ka drejtuar gishtin se sulmi ka ardhur nga deputetët Dardan Molliqaj e Dukagjin Gorani, duke mos respektuar “urdhrin” e Ymerit që të mos përdoret gjuhë fyese ndaj figurave të partisë.
“Lajmi i publikuar është rrenë. Ky sulm më është bë’ vetëm se nuk jam pjesë e grupit që shantazhon dhe mundohet ta shkatërrojë Levizjen nga brenda. Për këto shpifje janë zgjedhë me kujdes mediat e SHIK-ut, si (mini) metro e Valon Sylës, Periskopi i Dukagjin Goranit dhe shokëve të Dardan Molliqajt, Ekspressi i Berat Buzhalës. Se kush po i nxjerr infot, kjo u kuptua mbramë, kur informata ekskluzive të porositura nga grupi i shantazhit, dolën në Periskop direkt nga mbledhja e Kryesisë. Mbledhje e mbyllur. Të pavërteta gjithsesi. Sigurisht që nuk na trembni ju që keni frikë edhe nga Këshilli i Përgjithshëm”, ka shkruar Kurti.
Të mblidhet Këshilli i Përgjithshëm…
Ndërkohë zgjidhjen e situatës së re të krijuar në VV, aktivistët e këtij subjekti po e shohin përmes mbledhjes së Këshillit të Përgjithshëm, i cili me status është organi më i lartë i partisë.
Këshilli mblidhet një herë në tre muaj dhe hera e fundit kur kjo ka ndodhur sipas zyrtarëve të saj ka qenë në gusht të këtij viti.
Valdrin Ahmeti një prej aktivistëve më të zëshëm të VV-së sidomos në protesta, i cili pas skandalit hapur ka dale “pro” Kurtit thotë se shumica nuk dihet në ajër, por përcaktohet me zgjedhje demokratike, andaj kërkon që sa më parë të thirret Këshilli i Përgjithshem dhe të shpallen zgjedhjet për, meqë siç thotë afati është shtyrë për shkak të zgjedhjeve lokale.
“Nuk mund të vazhdojmë me shantazhet që po ia bëjnë Lëvizjes nje grusht njerëzish që thirren në shumicë. Kushdo që është anëtar i Lëvizjes ka të drejtë të kandidojë për kryetar nëse i plotëson kushtet e statutit. Unë i motivoj të gjithë ata që kanë aspirata që të drejtojnë Lëvizjen të kandidojnë, dhe ta pranojnë rezultatin zgjedhor.
P.s. Nëse ndonjëri nga kundërkandidatët e Albin Kurtit nuk arrin t’i sigurojë nënshkrimet për të hyrë në garë, unë premtoj se do t’ia jap nënshkrimin”, ka shkruar Ahmeti në Facebook.
Një kërkesë të tillë e kanë paraqitur edhe shumë aktivistë tjerë përmes profileve të tyre në rrjetet sociale.
Pas kësaj kërkese mediat kanë raportuar se deputeti Liburn Aliu dhe Fitore Pacolli (që mbajnë anën e Kurtit) në seancën e sotme plenare kanë nisur mbledhjen e 40 nënshkrimeve të nevojshme për thirrjen e mbledhjes së Këshillit të Përgjithshëm.
Me statutin e Lëvizjes Vetëvendosje në përbërje të Këshillit janë delegatët e qendrave, kryesia dhe deputetët. /tesheshi.com/
