Një protestë alla studentore është zhvilluar këto ditë në Peshkopi, ku nxënës të gjimnazit “Seid Najdeni” kanë refuzuar deri me bojkot mësimi transferimin dy muaj para përfundimit të sezonit të mësueses së tyre të anglishtes, Fatbardha Miftari.
Nxënësit rrethuan mësuesën e tyre në shenjë solidariteti, teksa ajo denonconte aktin e paligjshëm sipas saj të Drejtorisë Arsimore.
“Kam qenë pa gjumë. Lotët tuaj do të kthehen në drejtësi. Është shkelur ligji me dy këmbë
Lëvizja duhej bërë në shtator, dhe jo dy muaj para mbarimit të procesit mësimor, ku ju duhet të bëni provimet shtetërore me këtë stres tek ju dhe tek mua. E kam përjetuar shumë keq ndarjen në fund të vitit. A mos vallë kjo është dhurata një ditë para 7 marsit”, u shpreh mësuesja përballë nxënësve të saj, shumica e të cilëve ishin të përlotur.
Sipas tyre, transferimi i mësueses mund të jetë për shkaqe politike, pasi ajo ka kritikuar nivelin e ulët të arsimit në shkolla. /tesheshi.com/
