Myslimanë, katolikë e protestantë janë bërë bashkë për nder të “Muajit të Tolerancës dhe Solidaritetit” për të pastruar ambientet e xhamisë dhe kishës në Gjilan.
Me iniciativë të kryetarit të Komunës së Gjilanit, Lutfi Haziri, bashkësitë fetare në Gjilan kanë pastruar sot xhaminë e njohur si “Xhamia e Mulla Idriz Gjilanit”, e ndërtuar në vitin 1936, si dhe kishën “Shën Ana” të ndërtuar në vitin 1938 në fshatin Dunav të Karadakut
Në aktivitetin e “Muajit të Tolerancës dhe Solidaritetit” kanë marrë pjesë Naim Aliu nga Bashkësia Islame në Gjilan, Don Dominik Qerimi nga Kisha Katolike, Naim Bllaca nga Kisha Protestante, sikurse edhe besimtarët e tri besimeve fetare.
Në një postim në FB, kryetari i Gjilanit Lutfi Haziri, ka shkruar: “Me këtë aktivitet, nis shënimi i “Muajit të Tolerancës dhe Solidaritetit”. Vazhdojmë me aktivitetet tjera të shumta. Gjilani është shembull i kultivimit të tolerancës ndërfetare dhe ndëretnike.”/tesheshi.com/
