Vendet nordike kanë nisur kontrollet në kufij, me synimin për t’u prerë udhën refugjatëve të panumërt, por kjo e ka shtyrë Gjermaninë të paralajmërojë se zona e Shengenit është në rrezik.
Zëdhënësi i Ministrisë së Jashtme gjermane, Martin Schaefer, ka dalë para gazetarëve, para të cilëve ka deklaruar se, “Shengeni është shumë i rëndësishëm, por është në rrezik.”
Kontrollet nga autoritetet daneze në kufirin me Gjermaninë, si dhe nisja e kontrolleve të imtësishme nga Suedia në kufirin me Danimarkën, kanë ngritur pikëpyetje mbi lirinë e lëvizjes.
“Liria e lëvizjes është një parim i rëndësishëm; një nga arritjet më të mëdha në vitet e fundit,” u ka thënë gazetarëve Schaefer, duke iu referuar hapësirës së BE-së.
Norvegjia po ashtu, e cila është pjesës e hapësirës Shengen, lajmëroi javën e shkuar se do t’i kthente mbrapsht refugjatët që arrinin pa viza nga diku tjetër në zonën Shengen.”
Zëdhënësi i Ministrisë së Jashtme gjermane kujtoi se është “me rëndësi jetike që ne në Europë të gjejmë zgjidhje të përbashkëta”, për sa ka të bëjë me krizën e skajshme të refugjatëve. Ai e vuri theksin tek nevoja që BE-ja ta përqendrojë vëmendjen te garantimi i sigurisë së kufijve të vet të jashtëm. /tesheshi.com/
