Autoritetet gjermane kthyen në Shqipëri edhe 70 azilkërkues të tjerë, avioni i të cilëve u ul pasditen e së mërkurës në Rinas. Me deklaratat e shtetasve shqiptarë që thanë se iu ishte komunikuar thjesht kthimi, duket se autoritetet gjermane kanë përshpejtuar procedurat e kthimit të atdhe të atyre që kërkojnë azil nga Ballkani.
Mes azilkërkuesve të kthyer të mërkurën kishte edhe gra e fëmijë, e ata deklaruan se nuk ishin lajmëruar paraprakisht për kthimin në Shqipëri, por se u është thënë thjesht që do t’u ndryshojnë shtëpi.
Edhe javën e kaluar mbërritën me avionë më dhjetëra shqiptarë të rikthyer nga Gjermania.
Debati i fortë që ka shpërthyer në Gjermani në lidhje me fluksin e shtuar të azilkërkuesve nga Ballkani dhe menaxhimin e kësaj situate, ka nxitur disa zgjidhje, një prej të cilave edhe përshpejtimi i procedurave të kthimit. Autoritetet gjermane kanë bërë të qartë më shumë se një herë se nuk ka azil për shqiptarët në Gjermani, madje ata që e provojnë mund të përballen me penalitete si pamundësi të lëvizjes së lirë në Shengen. /tesheshi.com/
