Nuk kishte mbyllje më të mirë të karrierës ndërkombëtare të Lukas Podolski-t se ajo fitore e mbrëmshme e Gjermanisë ndaj Anglisë në një miqësore luksi.
Një stadium i tërë në Dortmund, “Signal Iduna Park”, do ta duartrokiste gjatë atë, në nisje e në mbarim të ndeshjes. Në nder të cilin Podolski do shpërblente me një gjuajtje fantastike në minutën e 69-të nga jashtë zonës së rreptësisë.
Një gol fantastik i tij, që u dha fitoren 1-0 gjermanëve. Një gol që i vuri kapakun një karriere fantastike me një prej përfaqësueseve më të mira të botës.
Një bilanc i shkëlqyer për sulmuesin 31-vjeçar të Gallatasarajit: 130 ndeshje me përfaqësuesen, 49 gola, dhe një Kupë Bote. Të tëra në 13 vite, nga i largëti vit 2004 në 2017-n.
“Ishte një ndeshje e madhe, një rezultat i madh, dhe një mënyrë fantastike për të thënë mirupafshim,” do të shprehej vetë Podolski.
Sa i përket ndeshjes në tërësi, ajo qe më shumë nën zotërimin e anglezëve, të cilët bënë një paraqitje të mirë ndaj gjermanëve me shumë mungesa në formacion. Kjo qe humbja e parë e Gareth Southgate-t si trajner në krye të Anglisë, në një takim ku lojtari më i mirë qe Dele Alli. /tesheshi.com/
