Ministrja gjermane e Zhvillimit Svenja Schulze njoftoi se qeveria gjermane do t’i japë Brazilit 204 milionë euro për mbrojtjen e mjedisit.
Nga shuma totale, 38 milionë dollarë janë donacion për Fondin e Konservimit të Amazonës, i cili përfaqëson kontributin më të madh në ruajtjen e pyjeve tropikale të Amazonës, raporton AP.
“Me qeverinë e re dhe ekipin e Presidentit Luiz Inacio Lula da Silva dhe Ministres së Mjedisit Marina Silva, ne kemi një shans të madh për të mbrojtur pyllin dhe për të ofruar një perspektivë të re për njerëzit që jetojnë atje,” tha Schulze.
Gjermania gjithashtu u zotua t’u japë fermerëve 87 milionë dollarë kredi me interes të ulët për të rivendosur zonat bujqësore dhe 34 milionë dollarë për të mbrojtur pyjet tropikale të Amazonës, sipas AP.
“Me gjithë vështirësitë, shtimin e shpyllëzimeve, rrëmbimin e tokave, zjarret, situatën e tmerrshme në të cilën ndodhet popullsia indigjene, ne e shohim këtë si një mundësi për ta kthyer të gjithë situatën”, tha Lula da Silva.
Pylli me biodiversitetin më të madh
Silva mori detyrën si president i Brazilit në fillim të janarit dhe u zotua t’i jepte fund shpyllëzimit deri në vitin 2030.
AP raporton se shpyllëzimi në Amazonën braziliane arriti nivelin më të lartë 15-vjeçar gjatë mandatit të presidentit të mëparshëm të Brazilit, Jair Bolsonaro, pasi ai hoqi politikat e mbrojtjes së mjedisit në favor të zgjerimit të agrobiznesit.
Pylli tropikal i Amazonës mbulon një zonë dy herë më të madhe se India dhe shërben si një pengesë ndaj ndryshimeve klimatike, pasi pemët e tij thithin një sasi të madhe të dioksidit të karbonit dhe vlerësohet se rreth dy të tretat e pyllit ndodhet në Brazil.
Pylli tropikal i Amazonës është pylli më i larmishëm biologjik në botë dhe përmban rreth 20 për qind të ujit të ëmbël në botë. /tesheshi.com/
