Ministri i Jashtëm i Gjermanisë, Frank Walter Steinmeier deklaroi se marrëdhëniet mes Kosovës dhe Serbisë janë përmirësuar, por nënvizoi se marrëveshja e prillit e vitit 2013 mes kryeministrit të atëhershëm serb, Ivica Daçiç dhe atij kosovar, Hashim Thaçi, nuk po zbatohet nga pala serbe.
“Për çdo vit në pranverë parlamenti gjerman gjendet para kësaj pyetjeje dhe dileme: të vazhdojë apo jo mandatin e trupave gjermane që shërbejnë në kuadër të KFOR-it në Kosovë?”, deklaroi ministri. Trupat e Bundeswehrit janë stacionuar në Kosovë para 16 vitesh dhe kanë dhënë kontribut të madh në stabilizimin e situatës pas luftës. Këtë fakt e nënvizoi edhe ministri i Jashtëm, Frank Walter Steinmeier, javën e kaluar në Bundestag, me rastin e leximit të parë në lidhje me vazhdimin e pjesëmarrjes së trupave gjermane në KFOR.
Steinmeier tha se, shumë njerëz mund të pyesin nëse ende ka kuptim të jenë të stacionuar ushtarët gjermanë në Kosovë. Kësaj pyetje ai u përgjigj me një ‘Po’ të qartë, sepse falë KFOR-it rajoni ka lënë pas pasigurinë dhe mungesën e stabilitetit. Steinmeier ka thënë se marrëdhëniet mes Kosovës dhe Serbisë janë rregulluar thellësisht ndryshe.
Por duke folur konkretisht për këtë marrëveshje Steinmeier e ka pranuar se ajo ende duhet të zbatohet nga Serbia. Si hapa pozitivë kryediplomati gjerman ka përmendur strukturat unike të policisë në veri të vendit dhe pushtetet legjitime komunale.
Steinmeier tha se momentalisht mes serbëve dhe kosovarëve po bisedohet për themelimin e asociacionit të komunave serbe, por, shtoi ai, për këtë duhet sqaruar edhe disa gjëra.
Bisedime intensive po zhvillohen edhe me Serbinë, e cila ka kërkuar hapjen e kapitujve për anëtarësim në BE. Steinmeier tha se pala gjermane ia ka bërë të qartë Beogradit se pa zbatimin thelbësor të marrëveshjes së prillit 2013 nuk mund të ketë bisedime mes BE-së dhe Serbisë. /tesheshi.com/
